बिर्तामोड, चैत २१ । सुनसरीका दुई स्थानमा बम राखेको भनेर प्रहरी झुक्याउने झापा र सुनसरीका दुईजनालाई इटहरी प्रहरीले पक्राउ गरेको छ ।
पुस १६ गते इटहरी उपमहानगरपालिका अगाडि र सुनसरी र मोरङ जोड्ने बुढी खोला पुलनजिक उनीहरुले होक्स राखेका थिए ।
पक्राउ पर्नेमा झापा कनकाई नगरपालिका–८ का ४६ वर्षीय सञ्जय भनिने खगेन्द्र खरेल र लक्ष्मीदेवी थापा छन् । खरेल यसअघि सुनसरी र झापामा पटकपटक बम विस्फोट गराउने कार्यमा संलग्न रहेका प्रहीको भनाइ छ ।
खरेल र थापालाई भारतमा लुकिछिपी बसेको अवस्थामा प्रहरीले केही दिन अघि पक्राउ गरेको हो । भारतबाट पक्राउ गरेर बुधवार राति मात्र सुनसरी ल्याइएको प्रहरी स्रोतको भनाइ छ ।
पुस १६ गते भने खरेलले म्यासेजमार्फत बम राखेको भनेर प्रहरीलाई नै खबर गरेका थिए । पछि इटहरी उपमहानगरपालिका र बुढी खोलानजिक भेटिएको शङ्कास्पद वस्तु बम नभई ’होक्स’ अर्थात् आतङ्क सिर्जना गर्नलाई बनाइएको सामग्री रहेको पुष्टि भएको थियो ।
खरेलको पृष्ठभूमिअनुसार उनी २०७६ वैशाख २८ गते गोर्खा जनमुक्ति पार्टीको नाममा झापाको कनकाई नदी पुलमा बम राखेको आरोपमा पक्राउ परेका थिए ।
२ वर्ष पाँच महिना कैदपछि झापा कारागारबाट छुटेका उनी २०७८ माघ ९ र माघ १३ गते झापाका केही चर्चमा शङ्कास्पद बस्तु राखेर फरार थिए । यो घटनामा भने झापा प्रहरीले ९ जनालाई पक्राउ गरेको थियो ।
त्यसपछि २०७८ चैत १४ इटहरी उपमहानगर–२ स्थित नवजागृति टोलको एक घरमा सुतली बम विस्फोट भएको घटनामा खरेल पुनः पक्राउ परेका थिए ।
यो घटनामा हाल पक्राउ परेकी थापाको पनि संलग्नता रहेको थियो । थापाकै घरमा राखेको सुतली बम विस्फोट हुँदा रविन थापा र लमजुङका शेरजङ गुरुङ घाइते भएका थिए । यो घटनामा इटहरी प्रहरीले खरेलसहित चारजनालाई पक्राउ गरी कारागार चलान गरेको थियो ।
तर, कारागारबाट छुटेपछि खरेल आफैँले पुस १६ गते इटहरी उपमहानगरपालिकाअगाडि र बुढी खोला पुलनजिक होक्स राखेर आतङ्क सिर्जना गरेका थिए ।
पक्राउ परेका खरेल र थापासँग थप अनुसन्धान भइरहेको प्रहरी स्रोतले जनाएको छ । अनुसन्धान पश्चात् दुवैजनालाई पत्रकार सम्मेलन गरी सार्वजनिक गर्ने तयारी गरिएको छ ।
