बिर्तामोड, चैत २१ । झापाको अर्जुनधारामा जारी प्रथम वडास्तरीय टि–२० नकआउट क्रिकेट प्रतियोगितामा वडा नम्बर ७ र वडा नम्बर ८ विजयी बनेका छन् ।
अर्जुनधारा नगर खेलकुद विकास समितिको आयोजनामा बुधबारबाट सुरु भएको प्रतियोगिताको दोस्रो दिनको पहिलो खेलमा वडा नम्बर ७ ले वडा नम्बर ६ लाई ४६ रनले पराजित गर्यो।
वडा नम्बर ७ स्थित अर्जुनधारा रङ्गशालामा भएको खेलमा टस जितेर वडा नम्बर ७ विरुद्ध पहिले फिल्डिङ रोजेको वडा नम्बर ६ ले २० ओभरमा ९ विकेट लिएर १३९ रन खर्चियो ।
१४० रनको लक्ष्य पाएर जवाफी ब्याटिङमा उत्रिएको वडा नम्बर ६ ले उत्कृष्ट ब्याटिङ गर्न सकेन । वडा नम्बर ६ ले १९ ओभरमा सबै विकेट गुमाएर ९३ रन मात्रै बनाउन सक्यो ।
आजको पहिलो खेलमा चार ओभरमा १४ रन खर्चेर चार विकेट लिन सफल वडा नम्बर ७ का प्रखर कटुवाल प्लेयर अफ द म्याच घोषित भए ।
त्यस्तै, आजै भएको दोस्रो खेलमा वडा नम्बर ५ विरुद्ध वडा नम्बर ८ ले ९९ रनको फराकिलो विजय हासिल गर्यो । खेलमा वडा नम्बर ५ ले टस जितेर फिल्डिङ रोजेको थियो । सुरुवाती ब्याटिङ गरेको वडा नम्बर ८ ले २० ओभरमा ६ विकेट गुमाएर १६४ रन जोडेको थियो ।
१६५ रनको लक्ष्य पाएको वडा नम्बर ५ ले फितलो जवाफी ब्याटिङ गर्दा नतिजा गुमाउन पुग्यो । वडा नम्बर ५ ले १७ ओभर ३ बलमा सबै विकेट गुमाएर ६५ रन मात्रै जोड्न सक्यो ।
दोस्रो खेलमा वडा नम्बर ८ का अलराउन्डर चन्द्र भट्टराई प्लेयर अफ दि म्याच घोषित भए । दुवै खेलका प्लेयर अफ द म्याचले नगद १ हजार पुरस्कार पाए ।
खेलाडी उत्पादनसँगै अर्जुनधारा नगरपालिकामा वडास्तरमा रहेका खेलाडीहरूको पहिचान गरी अर्जुनधारा नगरपालिकाको स्तरीय क्रिकेट टिम निर्माणका लागि प्रतियोगिता सञ्चालन गरिएको अर्जुनधारा नगर खेलकुद विकास समितिका अध्यक्ष सुरेन्द्र धिमालले जानकारी दिए ।
चैत २५ गतेसम्म सञ्चालन हुने प्रतियोगिताको विजेताले नगद ५० हजार तथा उपविजेताले नगद २५ हजार नगदसहित ट्रफी तथा मेडल पुरस्कार पाउने समितिका सचिव खगेन्द्र लिङ्देनले जानकारी दिए ।
