बिर्तामोड, चैत २१ । ’हाम्रो बिर्तामोड स्वस्थ बिर्तामोड’ भन्ने मुल नाराका साथ बिर्तामोड नगरपालिका वडा नम्बर १ ले आयोजना गरेको निःशुल्क स्वास्थ्य शिविरमा १७४ जनाले सेवा लिएका छन् ।
बिएन्डसी र पूर्वाञ्चल क्यान्सर हस्पिटलको प्राविधिक सहयोगमा आज वडा कार्यालय भवनमा आयोजित शिविरमा फिजिसियन, स्त्री तथा प्रसूति रोग विशेषज्ञ सेवासँगै इसिजी परीक्षण, भिआइए र रक्तचाप जाँच लगायतका सेवाहरु प्रदान गरिएको छ ।
सोही कार्यक्रमका बीच स्तन क्यान्सर, पाठेघरको मुखको क्यानसर र लागुऔषध दुव्र्यसनीविरुद्धको सचेतना कार्यक्रमसमेत सम्पन्न भएको छ ।
कार्यक्रमका प्रमुख अतिथि नगरका कार्यवाहक नगरप्रमुख नगेन्द्रप्रसाद संग्रौलाको प्रेसर जाँच गरेर शिविरको उद्घाटन गरिएको थियो ।
उद्घाटन कार्यक्रममा बोल्दै प्रमुख अतिथि संग्रौलाले स्वास्थ्य बीमा अनिवार्य गर्न सबैलाई आग्रह गरे । बिर्तामोड नगर अस्पताललाई सुविधासम्पन्न बनाउन नगरपालिकाले काम गरिरहेको भन्दै उनले आगामी वर्षदेखि चौबीसै घण्टा सेवा उपलब्ध गराउने प्रयास रहेको जानकारी दिए । उनले नियमित स्वास्थ्य परीक्षण गर्न सबैलाई आग्रह गरे ।
त्यस्तै, कार्यक्रममा बोल्दै नगरका प्रमुख प्रशासकीय अधिकृत सागर मिश्रले अस्वस्थ खानपानका कारण दिनानुदिन ठुला रोगीको संख्या बढ्दै गएको बताए । विषादी प्रयोग गरिएका सागसब्जीको कारण प्राणघातक रोगहरु लाग्ने गरेको भन्दै उनले बिर्तामोड नगरपालिकाले अर्गानिक तरकारी उत्पादनमा जोड दिँदै आएको जानकारी दिए ।
त्यस्तै, नगरका प्रवक्तासमेत रहेका वडा नम्बर १ का वडा अध्यक्ष अग्निप्रसाद पाण्डेले लागुऔषध दुव्र्यसनीका कारण पनि विभिन्न रोगहरु लाग्ने भएकाले स्वास्थ्य शिविरसँगै सचेतनामुलक प्रशिक्षण कार्यक्रम सञ्चालन गरिएको जानकारी दिए ।
कार्यक्रममा कार्यपालिका सदस्य यमुना आचार्यले स्वागत तथा वडा सचिव जानुका बस्नेतले सञ्चालन गरेकी थिइन् ।
