मेचीनगर, चैत २१ । बाहुनडाँगी युवा क्लबको आयोजनामा प्रथम बाहुनडाँगी च्यालेञ्ज कप हुने भएको छ । प्रतियोगिता मेचीनगर–४ स्थित सरस्वती माविको खेलमैदानमा हुनेछ ।
२०८२ बैशाख १३ गतेदेखि २० गतेसम्म सञ्चालन हुने प्रतियोगिताको मुख्य प्रायोजकमा विद्या विकास एकाडेमी रहेको छ । मुख्य प्रायोजक संस्थाबाट प्रतियोगिता सम्पन्न गर्न १ लाख ७२ हजार रुपैयाँ प्राप्त हुने आयोजकले जनाएको छ ।
प्रतियोगिताको विजेताले १ लाख ११ हजार रुपैयाँ र उपविजेताले नगद ६१ हजारसहित ट्रफी, मेडल र प्रमाण पत्र प्राप्त गर्नेछन् ।
प्रतियोगिताको संरक्षकमा मेचीनगर ४ नम्बर वडा कार्यालय र सहआयोजकमा बाहुनडाँगी जेसिज, आरआरटी बाहुनडाँगी रहेका छन् ।
प्रतियोगिताअन्तर्गत विभिन्न विधामा समेत खेलाडीहरुलाई अवार्ड प्रदान गरिनेछ । प्रत्येक खेलका प्लेयर अफ द म्याच, उत्कृष्ट गोलकिपर, प्लेयर अफ द टुर्नामेन्ट र सर्वाधिक गोलकर्तालाई नगद, मेडल र प्रमाणपत्र प्रदान गरिने आयोजकले जानकारी दिएको छ ।
प्रतियोगितामा भारतका ३ र नेपालका ५ गरी जम्मा ८ वटा टिमले सहभागी जनाउने संस्थाका अध्यक्ष जीवनकुमार मोतेले जानकारी दिए ।
