–
विनिशा शर्मा
बिर्तामोड, बैशाख ३ । नयाँ वर्ष मनाउन र विद्यालय विदाको सदुपयोग गर्न इलामको गुफा पाताल उपयुक्त गन्तव्य हुनसक्छ । नेपालीहरु खासै नपुग्ने इलामको सूर्योदय-४ मा रहेको गुफा पातालमा पाँचवटा होमस्टे रहेका छन् ।
एसइइ सकिएर फुर्सदिला भएपछि बुवाआमासँगै घुम्न जाने योजनामा रहेका विद्यार्थी र छुट्टी मनाउन नयाँ गन्तव्यको खोजीमा रहेका नेपालीका लागि इलामको सीमावर्ती गाउँ गुफा पाताल मनमोहक गन्तव्य हुनसक्छ ।
कोशी प्रदेश पर्यटन वर्ष २०८२ को सूचीमा चर्चा नगरिएको गुफा पाताल भारतीय गाउँ छब्बिसेसँगै जोडिएको छ । भारतको मिरिक नजिकै रहेकाले त्यहाँ पुग्ने अधिकांश भारतीय पर्यटक गुफा पाताल आउने गरेका छन् ।
दार्जिलिङ, मिरिक घुम्न आउने भारतीय र बंगलादेशी पर्यटकहरु एक दिनका लागि भए पनि गुफा पाताल पुग्ने गरेका छन् । गुफा पातालको छेवैमा मेची नदीको उद्गमस्थल पनि देख्न सकिन्छ ।
त्यस्तै, यहाँबाट कञ्चनजंघा हिमाल, सूर्योदय तथा सूर्यास्त, विभिन्न जीवजन्तु, वनस्पति र पहाडी सुन्दरताको दृश्यावलोकन गर्न सकिने भएकै कारण पर्यटकहरुको लागि आकर्षक हुन थालेको स्थानीय माउन्ट भ्यु होमस्टेका सञ्चालक रविन प्रधानले जानकारी दिए ।
गुफा पातालबाट राति तथा बिहान, दिउँसो मौसम खुलेको बेला मिरिक, दार्जिलिङ, खर्साङ, इलाम तथा झापालाई देख्न पाउँदा रोमाञ्चक अनुभव हुन्छ ।
गुफा पातालको समथर डाँडोमा बसेर चिसो हावा र हुस्सुसँगै लुकामारी खेल्दै रमाइलो गर्ने भारतीय समूहको घुइँचो नै हुने गरेको छ ।
सरकारको उपेक्षा
सूर्योदय वडा नम्बर ४ मै श्रीअन्तु पनि पर्ने भएकाले सरकारी बजेटबाट गुफा पाताल निक्कै टाढा छ । २०६१ सालमै समिति दर्ता गरेर सामुहिक रुपमा जग्गा किनेर संरक्षण गरिए पनि राज्यबाट गुफा पाताल उपेक्षित छ । गुफा पातालमा होमस्टे सञ्चालन गर्ने सबै स्थानीयको स्वर एउटै छ, ‘यो ठाउँलाई सरकारले हेरेन ।’
स्थानीय बुद्धिलाल तामाङले दान दिएको एक रोपनी जग्गामा स्थानीयले रकम संकलन गरेर सात रोपनी बनाएर हाल घेराबारा गर्दै भ्यु टावर बनाएका छन् । तर, भ्यु टावर पनि अपूर्ण रहेको स्थानीय होमस्टे सञ्चालक मदन गुरुङले बताए ।
सबैभन्दा आवश्यक त छिरुवाबाट गुफा पातालसम्म पुग्ने सडक जीर्ण छ । भारतीय पर्यटकका लागि उत्तम गन्तव्य भए पनि नेपाली पर्यटक भने सडकका कारण आउन सकिरहेका छैनन् ।
श्रीअन्तु नजिकैको छिरुवाबाट ६ किलोमिटरको उकालोमा रहेको गुफा पातालसम्म पुग्न पक्की सडक बनिए श्रीअन्तुभन्दा उत्कृष्ट र सुन्दर गन्तव्य हुने नेपाल एसोसिएसन अफ ट्राभल्स एन्ड टुर्स कोसीका महासचिव नविन खरेलले बताए ।
पाँच वर्षदेखि होमस्टे सञ्चालन गर्दै आएका प्रधानका अनुसार नेपालपट्टि कच्ची बाटोका कारण आन्तरिक पर्यटक आउन सकेका छैनन् ।
नेपालतर्फबाट सुविधायुक्त सडक नभएकै कारण आन्तरिक पर्यटक भित्र्याउन नसकिएको स्थनीय होमस्टे सञ्चालक शान्ति शेर्पाले बताइन् ।
