बिर्तामोड जेठ ११ । झापाका अधिकांश सडकमा बनाइएको जेब्राक्रसको इन्जिनियरिङ गलत भएकाले दुर्घटना बढिरहेको ट्राफिक प्रहरी प्रमुखले जिकिर गरेका छन् । मुख्य सहरमा बनाइएका जेब्राक्रस नै गलत ठाउँमा रहको उनको भनाइ छ ।
नेपाल औषधि व्यवसायी संघ (एनसिडिए) झापासँगको छलफल कार्यक्रममा जिल्ला ट्राफिक प्रहरी कार्यालय झापाका प्रमुख प्रहरी निरीक्षक गणेश पौडेलले जेब्राक्रसको स्थान परिवर्तन गर्नुपर्ने बताए ।
‘एउटै चोकमा एक ठाउँ होल्ड भएको गाडी अर्कोपट्टि पुगेर फेरि जेब्रा क्रसका कारण रोकिनु परिरहेको छ’, प्रहरी निरीक्षक पौडेलले भने, ‘अब गाडी कहाँकहाँ रोक्ने त ?’
उनले बिर्तामोड मुक्तिचोक र आसपासमा जेब्राक्रसमा परिवर्तन ल्याउनुपर्ने बताए । त्यस्तै, मस्कट लगाएका अभियनकर्मीमार्फत ट्राफिक सचेतना कार्यक्रम गर्न लागिएको पौडेलले सुनाए ।
छलफलमा संघ कोशी प्रदेशका संस्थापक वरिष्ठ उपाध्यक्ष नरेन्द्र बराल, सदस्य याम खड्का, झापाका अध्यक्ष जीवनकुमार खड्का, निवर्तमान उपाध्यक्ष प्रदिप खरेल लगायतले बिर्तामोडको पार्किङ समस्याका बारेमा सुझाव दिएका थिए ।
छलफलअघि संघले ट्राफिक प्रहरीलाई ५० थान लागुपदार्थ सेवन जाँच किट हस्तान्तरण गरेको थियो ।
