बिर्तामोड, साउन ८ । अस्ति मङ्गलबारसम्म सक्रिय रहेको मनसुन फेरि निष्क्रियजस्तै भएको छ । मनसुनी वायुको प्रभाव कमजोर रहेको मौसम पूर्वानुमान महाशाखाले जनाएको छ ।
मनसुनको न्यून चापीय रेखा सरदर स्थानको दक्षिणतर्फ अवस्थित छ । मौसमविद् हरिप्रसाद दाहालका अनुसार मनसुन निष्क्रिय नभएर कम सक्रिय भएको हो ।
मनसुन कम सक्रिय भएकाले झापासहित देशका धेरै ठाउँको मौसम सुक्खा भएको छ । आज पनि बिहानैदेखि घाम चर्किएको छ । हिजो राति केही ठाउँमा हल्का वर्षा मात्रै भयो ।
खासगरी पूर्वी तराई र मधेशमा पानी पर्न नसक्दा तापक्रम घटेको छैन । राति पानी पर्न खोजे पनि दिउँसो घाम लाग्ने देखिँदै आएको छ । जनजीवन प्रभावित छ ।
नेपालमा मनसुन गत जेठ १५ गते भित्रिएको थियो । कोशी प्रदेशबाट भित्रिएको मनसुन फैलिँदै सुदूरपश्चिम पुगे पनि पूर्वमा भने पानी पर्नै सकेको छैन ।
आज दिउँसो कोशी, बागमती, गण्डकी, कर्णाली र सुदूरपश्चिमको पहाडी भेगसहित केही ठाउँमा मेघगर्जन र चट्याङसहित हल्कादेखि मध्यम वर्षको सम्भावना छ ।
राति कोशी र मधेश प्रदेशका एक/दुई ठाउँमा ठुलो पानी पर्न सक्ने मौसम पूर्वानुमान महाशाखाले जनाएको छ ।
