बिर्तामोड, माघ १२ । झापामा पछिल्लो छ महिनाको अवधिमा ५५ नयाँ कुष्ठरोगी फेला परेका छन् । चालु आर्थिक वर्ष २०८२/८३ को पुस मसान्तसम्म एक बालबालिकासहित ५५ नयाँ कुष्ठरोगी फेला परेको स्वास्थ्य कार्यालय झापाका कुष्ठरोग फोकल पर्सन वीरेन्द्र दासले जानकारी दिए ।
उनका अनुसार जिल्लाका १५ वटा पालिकामध्ये सबैभन्दा धेरै दमक नगरपालिका र कचनकवल गाउँपालिकामा १२÷१२ नयाँ कुष्ठरोगी फेला परेका छन् ।
त्यस्तै, मेचीनगर नगरपालिकामा तीनजना, बुद्धशान्ति गाउँपालिकामा दुईजना, शिवसताक्षी नगरपालिकामा पाँचजना, गौरादह नगरपालिका र गौरीगञ्ज गाउँपालिकामा दुईदुईजना, बाह्रदशी गाउँपालिका र बिर्तामोड नगरपालिकामा पाँचपाँचजना र भद्रपुर नगरपालिकामा चारजना नयाँ कुष्टरोगी फेला परेका छन् । चालु आर्थिक वर्षमा ५३ कुष्ठरोगीले उपचारसमेत पाएको फोकल पर्सन दासले बताए ।
पछिल्लो पाँच वर्षको तथ्याङ्क हेर्दा झापा जिल्लामा नयाँ कुष्ठरोगी फेला पर्ने संख्या बढ्दै गएको देखिन्छ । जिल्लामा गत आर्थिक वर्ष २०७७/७८ मा ९५ जना कुष्ठरोगी फेला परेका थिए ।
आर्थिक वर्ष २०७८/७९ मा एक सय २१, आर्थिक वर्ष २०७९/८० मा एक सय ५७, आर्थिक वर्ष २०८०/८१ मा एक सय २१ र २०८०/८१ मा एक सय ४७ नयाँ कुष्ठरोगी फेला परेको कार्यालयले जनाएको छ ।
तथ्याङ्कको आधारमा हेर्दा २०७७÷७८ मा सङ्क्रमण दर १.०२ प्रतिशतबाट आर्थिक वर्ष २०८०÷८१ मा आइपुग्दा १.४७% पुगेको देखिन्छ ।
विश्वमा बर्सेनि झन्डै दुई लाख नेपालमा बर्सेनि करिब दुई हजार पाँच सय नयाँ कुष्ठरोगी फेला पर्ने गरेको फोकल पर्सन दास बताउँछन् । चिह्न र लक्षणको आधारमा कुष्ठरोग दुई प्रकारको हुने उनले बताए ।
“कम सर्ने खालको कुष्ठरोग र सर्ने खालको कुष्ठरोग हुन्छ”, उनले भने, “बहु–औषधि उपचार पद्धतिद्वारा छ देखि १२ महिनाको अवधिसम्म तीन प्रकारका औषधिको प्रयोगबाट कुष्ठरोग निको हुन्छ र समयमै कुष्ठरोगको उपचार भएमा अपाङ्गता पनि हुँदैन ।” सामाजिक अवहेलनाको डरले गाउँघरमा अझै पनि धेरै कुष्ठरोगी लुकेर रहेकाले सुक्ष्म रुपमा खोजपतड्ला गर्नुपर्ने उनको भनाइ छ ।
