बिर्तामोड,चैत १० । लागुऔषध मुद्दामा पक्राउ परेका व्यक्तिलाई प्रहरी हिरासतबाट छुटाइदिने भन्दै ठगी गर्ने दुईजनालाई प्रहरीले पक्राउ गरेको छ।
पक्राउ पर्नेहरूमा दमक वडा नम्बर ९ का ३० वर्षीय अरुण दनुवार र कमल गाउँपालिका वडा नम्बर ६ का ३२ वर्षीय सुमन खड्का रहेका छन्।
फागुन २५ गते कमल गाउँपालिका वडा नम्बर ६ बाट अवैध लागुऔषध खैरो हिरोइन सहित पक्राउ परेका लक्ष्मण राजवंशीलाई हिरासतबाट निकालिदिने प्रलोभन देखाई दनुवार र खड्काले लक्ष्मणका दाजु रामप्रसाद राजवंशीबाट १ लाख ५० हजार रुपैयाँ लगेका थिए।
आफू ठगिएको थाहा पाएपछि पीडितले दिएको सूचनाका आधारमा प्रहरीले उनीहरूलाई चैत ८ गते पक्राउ गरेको हो।
पक्राउ परेका दुवैजनामाथि मुलुकी अपराध संहिता २०७४ अन्तर्गत ठगी तथा आपराधिक लाभ कसूरमा जिल्ला अदालत झापाबाट ७ दिनको म्याद थप गरी आवश्यक अनुसन्धान भइरहेको प्रहरीले जनाएको छ।
