बिर्तामोड । सहारा नेपाल बचत तथा ऋण सहकारी संस्था बिर्तामोड झापाले नेपालको सहकारी अभियानका एक सिद्धहस्त अभियन्ता केशव बडाललाई राष्ट्रिय व्यक्तित्व सम्मान तथा पुरस्कार प्रदान गर्ने भएको छ ।
संस्थाको हालै सम्पन्न सञ्चालक समितिको बैठकले बडाललाई एक लाख रुपैयाँ राशिको राष्ट्रिय व्यक्तित्व सम्मान तथा पुरस्कार प्रदान गर्ने निर्णय गरेको हो । सहारा नेपालका कार्यकारी प्रमुख महेन्द्रकुमार गिरीका अनुसार यही चैत १५ गते संस्थाले आयोजना गर्ने रजत महोत्सव समारोहमा बडाललाई उक्त पुरस्कार तथा सम्मान प्रदान गरिनेछ ।
सहकारी अभियानका लागि प्रारम्भिक संस्थाहरुमध्ये सहाराले स्थापना गरेको उक्त पुरस्कार सर्वाधिक रहेको बताइएको छ । सहकारी तथा लघुवित्तका क्षेत्रमा काम गर्ने एक व्यक्तिलाई हरेक दुई वर्षमा प्रदान गर्ने गरी सहाराले स्थापना गरेको सो पुरस्कार दोस्रोपटक प्रदान गर्न लागिएको हो ।
सहकारीका सबैजसो घटना र इतिहासका जानकार तथा सहकारीलाई किन अवलम्बन गर्नेजस्ता विषयमा धाराप्रवाह विचार मन्थन गर्नसक्ने क्षमता भएका बडाललाई ‘सहकारीका विश्वकोष’ उपमाले पनि चिन्ने गरिन्छ ।
तीन दशकदेखि सहकारी अभियानमा होमिएका बडालले प्रतिनिधिसभाको सदस्य रहँदा ‘सहकारी ऐन २०४८’ र संविधानसभाको सदस्य तथा व्यवस्थापिका संसदको सदस्य रहँदा ‘सहकारी ऐन २०७४’ निर्माणमा नेतृत्वदायी एवम् निर्णायक भूमिका खेलेका थिए ।
नेपालको सामाजिक, आर्थिक तथा राजनीतिक परिवर्तनमा उल्लेखनीय योगदान गर्ने अथक एवम् प्राज्ञिक अभियन्ता बडालले सहकारी क्षेत्रलाई नेपालको अर्थतन्त्रको एउटा खम्बाका रुपमा स्थापित गराउन महत्वपूर्ण भूमिका खेलेका छन् ।
समाजवाद उन्मुख लोकतान्त्रिक आर्थिक प्रणाली अवलम्बन गर्न प्रोत्साहित गर्दै राष्ट्रिय समृद्धिमा निरन्तर लागेका केशव बडाल सहकारी अभियानको छाता संस्था राष्ट्रिय सहकारी महासंघका निवर्तमान अध्यक्ष हुन् । उनी २०६७ सालदेखि २०७६ पुससम्म महासंघको अध्यक्ष रहेका थिए । अन्तर्राष्ट्रिय सहकारी महासंघ (आइसिए)मा एसिया प्रशान्त क्षेत्रबाट सञ्चालक निर्वाचित भएर नेपालको सहकारी अभियानलाई अन्तर्राष्ट्रिय पहिचान दिलाउन बडालकै हात रहेको बताइन्छ ।
