बिर्तामोड, कात्तिक १२ । काँकरभिट्टा हुँदै नेपाल आउने पर्यटक बढेका छन् । सो नाका चार वर्षपछि दुई महिनाअघि मात्र खुला गरिएको थियो ।
गत दुई महिनामा ८९० जना तेस्रो मुलुकका नागरिक नेपाल प्रवेश गरेको अध्यागमन कार्यालय काँकरभिट्टाले जनाएको छ ।
सन् २०२४ को सेप्टेम्बर महिनामा यो नाका भएर २८७ जना तेस्रो मुलुकका नागरिक नेपाल प्रवेश गरेको अध्यागमन कार्यालय काँकरभिट्टाका प्रमुख तुलसी भट्टराईले बताए ।
अक्टुबरमा भने ६०३ जना पर्यटक नेपाल आएका छन् । अघिल्लो महिनाको तुलनामा पछिल्लो महिना दोब्बर संख्यामा पर्यटकको आगमन भएको छ ।
कोभिडका बेला काँकरभिट्टासँग जोडिएको भारतीय नाका पानीट्यांकीबाट तेस्रो मुलुकका नागरिकलाई आउजाउ गर्न निषेध गर्दै आएको थियो ।
