बिर्तामोड, मंसिर १० । झापाको अर्जुनधारा-११ बुट्टाबारी र र बिर्तामोड-६ मसाले टोलमा हिजो राति आगलागी हुँदा करिब २५ लाख रुपैयाँको क्षति भएको प्रहरीले जनाएको छ ।
अर्जुनधारा-११ मा रहेको आशिष वनको घरको सटरमा दिपक राजवंशीले सञ्चालन गरेको मोटरसाइकल वर्कसपमा विद्युत सर्ट भएर आगलागी भएको हो ।
आगलागीबाट वर्कसपमा रहेको मर्मतको लागि राखिएको स्कुटर, सुपर स्प्लेन्डर मोटरसाइकल र एयर कम्प्रेसर तथा मर्मतमा प्रयोग हुने विभिन्न औजारहरु जल्दा १५ लाख रुपैयाँबराबरको क्षति भएको इलाका प्रहरी कार्यालय बिर्तामोडले जनाएको छ ।
त्यस्तै, बिर्तामोड-६ स्थित अर्जुन थलानको परालको थुप्रोमा आगलागी हुँदा नजिकै रहेको पञ्चसेवा ग्यारेजमा मर्मत गर्न राखेको सक्षम निर्माण सेवाको बा.०३-००१ क ०३३१ नम्बरको टिपरमा आगो लाग्दा १० लाख रुपैयाँबराबरको क्षति भएको प्रहीले जनाएको छ ।
