बिर्तामोड, चैत ६ । झापाको कनकाई नगरपालिकास्थित सुरुंगामा आन्तरिक पर्यटन प्रवर्धन एवम् वातावरण संरक्षणका लागि खुला साइकल दौड प्रतियोगिता हुने भएको छ ।
सुरुंगा सहकार्य युवा क्लबको आयोजनामा चैत ९ गते हुने प्रतियोगिताको तयारी पूरा भएको क्लबका अध्यक्ष सुमन कार्कीले जनकारी दिए । प्रतियोगितामा ५० जना साइक्लिस्टलाई मात्र सहभागी गराइनेछ ।
दौड डिलाइट होटलबाट सुरु भई सुरुंगा पुल, जामुनबारी मावि, पशुपति प्रावि, प्रजापति सामुदायिक वन, जामुनखाडी सिमसार, पञ्चकन्या प्रावि भुरुङ्गा, धनुषकुटी चोक सुकेडाँगी, कनकाई सामुदायिक वनको पूर्वी सीमा हुँदै ट्राफिक चोकबाट डिलाइट होटलमा आएर टुंगिनेछ ।
क्लबका कोषाध्यक्ष एवम् प्रतियोगिता संयोजक पूर्णकुमार श्रेष्ठका अनुसार साइकल दौड १५ किलोमिटर दूरीको हुनेछ । प्रतियोगिताको विजेताले नगद १५ हजार रुपैयाँ पाउनेछ ।
त्यस्तै, दोस्रो हुनेले नगद १० हजार र तेस्रो हुनेले नगद ७ हजार ५०० रुपैयाँ प्राप्त गर्नेछ । विजेता सबैलाई ट्रफी, मेडल र प्रमाणपत्र दिइने श्रेष्ठले बताए । सान्त्वना पुरस्कारस्वरुप पाँचजना सहभागीलाई नगद २ हजारका दरले प्रदान गरिनेछ ।
साइकल दौडको रुट कनकाईमा रहेका चारवटै सामुदायिक वनसँग जोडेर बनाइएको कनकाई सामुदायिक वनका अध्यक्ष ख्याम ओलीले बताए । दौडले स्वास्थका साथै खेल पर्यटन प्रवर्धनमा महत्त्वपूर्ण भूमिका खेल्ने विश्वास लिइएको ओलीले बताए ।
