बिर्तामोड, चैत १८ । राजावादी आन्दोलनलाई उत्तेजित बनाउने आरोपमा हालसम्म छजना झापाली पक्राउ परेको जिल्ला प्रहरी परिसर काठमाडौँले जनाएको छ ।
काठमाडौँको तीनकुनेमा हिंसा भड्काएको आरोपमा आज साँझसम्म प्रहरीले उनीलाई पक्राउ गरेको हो । तीनकुने घटनामा आपराधिक गतिविधि गरेको आरोपमा आइतबार ४१ जनाविरुद्ध अनुसन्धान अगाडि बढाएको छ ।
पक्राउ पर्नेमा विष्णुजंग बस्नेत, सीतादेवी राई र देवी संग्रौला रहेको काठमाडौँ उपत्यका अपराध अनुसन्धान कार्यालयले जनाएको छ ।
त्यस्तै, अन्य तीनजनालाई यसअघि नै पक्राउ गरिएको थियो । शुक्रबार तीनकुनेको हिंसात्मक आन्दोलनमा ढुंगामुढा गर्ने कथित धर्मगुरु बुद्धशान्ति-७ का २९ वर्षीय पुष्कर खतिवडालाई दुई दिनअघि पक्राउ गरिएको थियो ।
त्यस्तै, मेचीनगर-७ जोरसिमल स्थायी घर भई भक्तपुर, मध्यपुर ठिमी बस्ने ४२ वर्षीय गोपिकृष्ण खड्का र बिर्तामोड-४ मेगाबारी स्थायी घर भई सोही ठाउँ बस्ने ५१ वर्षीय रामकुमार धिमाल पक्राउ परेका छन् ।
