बिर्तामोड, चैत २१ । भारतले भद्रपुरसँग सीमा जोडिएको गलगलिया नाका खुला गरेको छ । नाका खुला गरेको जानकारी आएको नेपाल भारत मैत्री संघका झापा अध्यक्ष प्रदिपमणि रेग्मीले बताए ।
मेची खोलामा पक्की पुल बनेपछि नेपाल सरकारले भद्रपुर भन्सारलाई मालसामान आयात निर्यात हुन सक्नेगरी स्तरोन्नति गरे पनि सीमा जोडिएको गलगलियाको क्षमता विस्तार नगरिँदा निकासी पैठारी हुन सकेको थिएन ।
रेग्मीले भारत सरकारले आजैबाट गलगलिया भन्सार भएर आयात निर्यात सहज बनाएको जानकारी दिए । ऐन कानुनले छुट दिएका मालवस्तु आयात निर्यात गर्न सकिने बताइएको छ ।
गलगलिया नाका विहार राज्यअन्तर्गत पर्ने भएकाले अझ सुविधा छ । मेची भन्सार पश्चिम बङ्गालमा पर्ने भएकाले माल सामानको जाँच परीक्षण गर्नु पर्दा कलकत्ता पठाउन पर्छ ।
तर, गलगलिया विहार राज्यमा पर्ने भएकाले जोगमनीबाटै परीक्षण हुने व्यवस्था भएकाले निकासी अत्यन्तै सहज हुनेछ । व्यवस्थित भन्सारका लागि समय केही लाग्ने भए पनि काम सुरू भइसकेको रेगमीले जानकारी दिए ।
