२०८० चैत्र १६ शुक्रबार
Jhapa Today
Adv top
Adv below_nav

दमकका ६२ वर्षीयमा कोरोना संक्रमण, नेपालमा ४९ संक्रमित


१० जना निको भएर फर्किए घर

बैशाख १२ गते निको भएर घर फर्किनुअघि बागलुङकी अंशु सापकोटा ।


बिर्तामोड, बैशाख १२ । झापा दमकका ६२ वर्षीय पुरुषमा कोरोना भाइरसको संक्रमण पुष्टि भएको छ । बिपी कोइराला स्वास्थ्य विज्ञान प्रतिष्ठानको प्रयोगशालामा उनको स्वाब परीक्षण गर्दा कोरोनाको संक्रमण पुष्टि भएको हो ।

आइसोलेसनमा उपचाररत उनको स्वास्थ्य अवस्था सामान्य रहेको स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीले जानकारी दिएका छन् । नेपालमा कोभिड १९ पुष्टि भएकाहरूको जम्मा संख्या ४९ पुगेको छ ।

संक्रमितका छोरा चैत ४ गते दुबईबाट घर आएको खुलेको छ । विमानबाट काठमाडौँ ओर्लिएका उनी बस चढेर घर पुगेका थिए । विदेशबाट आएकाहरुको परीक्षणका क्रममा उनीसँगै परिवारमा रहेका उनका आमा, बुवा र श्रीमतीको टेस्ट गरिएको थियो । श्रीमतीबाहेक सबैको आरडिटी पोजेटिभ आएको थियो ।

त्यसपछि सबैको थ्रोट स्बाव संकलन गरेर धरानस्थित बिपी कोइराला स्वास्थ्य विज्ञान प्रतिष्ठानमा पठाइएको थियो । अरु सबैको रिजल्ट नेगेटिभ आएको छ । रिपोर्ट पोजेटिभ आएका ६२ वर्षीय बुवा डाइबेटिजको बिरामी भएको पाइएको छ । तर, परिवारका कुनै सदस्यमा पनि लक्षण देखिएको थिएन ।

चारैजनालाई तत्काल दमक अस्पतालको आइसोलेसनमा भर्ना गरेको दमक नगरपालिकाकी उपप्रमुख गीता अधिकारीले जानकारी दिइन् । दमक नगरपालिकाले शुक्रबार सार्वजनिक गरेको सूचनाअनुसार दमक अस्पतालको आइसोलेसन वार्डमा २ महिलासहित ७ जनालाई भर्ना गरिएको छ ।

अब संक्रमितको सम्पर्कमा रहेकाहरुको खोजी गरेर परीक्षण गर्ने तयारी थालिएको जिल्ला जनस्वास्थ्यका उपप्रमुख जीवन चौलागाईंले जानकारी दिए । करिब ४०० जनको थ्रोब स्बाव संकलन गर्ने तयारी छ ।

शुक्रबार कोरोना संक्रमण पुष्टि भएका झापा दमकका ६२ वर्षीय वृद्धको घरमा बुधबारमात्र मरिमराउको काम सकिएको थियो । सासूआमाको निधन भएपछि संक्रमित वृद्धकी श्रीमती र दिदीसासू दमकस्थित उनको घरमा किरियामा बसेका थिए । उनकी दिदीसासू इटहरीको हाँसपोसाबाट दमकस्थित उनको घरमा आएर किरियामा बसेकी थिइन् ।

काममा बस्ने क्रममा उनको घरमा हाँसपोसाबाट दिदीसासूसहित २, दमक नगरपालिका ६, ७ र ९ नम्बर वडाबाट ४–४ जनासहित करिब ३५ जना आफन्त आएका थिए । फागुन ३० गतेको नेपाल एयरलाइन्समार्फत छोरा काठमाडौँ झरेका थिए । तीन दिन काठमाडौँमै बसेका छोरा चैत ४ गते बसमार्फत दमक घर आइपुगेका थिए ।

बैशाख ११ गते दमक नगरपालिकाको स्वास्थ्यकर्मीको टोलीले घरमै पुगेर र्यापिड डायग्नोस्टिक टेस्ट (आरडिटी) परीक्षण गर्ने क्रममा छोरालाई कोरोनाको एन्टिबडी पोजिटिभ देखिएको थिएको थियो ।

यसैबीच, कोरोना भाइरसलाई जित्दै बागलुङकी १९ वर्षीया युवती अंशु सापकोटा शुक्रबार राति अस्पतालबाट डिस्चार्ज भएकी छन् । बागलुङ नगरपालिका ४, कुँडुलेकी उनलाई अस्पतालले शुक्रबार राति करिब १० बजेतिर डिस्चार्ज गरेको हो ।

उनी गत चैत ४ गते बेल्जियमबाट नेपाल आएकी थिइन् । चैत १० गते उनमा कोरोना भाइरस संक्रमण पुष्टि भएको थियो । उनी नेपालकी पाँचौँ संक्रमित हुन् । उनीसँगै नेपालमा १० जना संक्रमित निको भएर घर फर्किएका छन् ।

उनीसँगै आएकी ६५ वर्षीय मनकुमारी पौडेललाई पनि कोरोना पोजिटिभ भएको थियो । गत शनिबार पौडेल निको भएर डिस्चार्ज भइसकेकी छन् । पौडेल र सापकोटालाई लिन गएका एक आफन्तको भने स्वाब परीक्षण नेगेटिभ आइसकेको छ ।

नेपालमा संक्रमितको संख्या ४९ पुगेको छ । सबैभन्दा धेरै उदयपुरमा २८ जना संक्रमित छन् । उनीहरु सबैको विराटनगरस्थित कोरोना अस्पतालमा उपचार भइरहेको छ ।

Leave a Reply

Your email address will not be published. Required fields are marked *

*

*

*

Adv footer