बिर्तामोड, जेठ ३१ । कोभिडका कारण लामो समयदेखि बन्द रहेको ओपिडी सेवालाई बिएन्डसी टिचिङ हस्पिटलले असार १ गतेदेखि नियमित रुपमा खुला गर्ने भएको छ ।
आम नागरिकको जनजीवन सामान्य अवस्थातर्फ गइरहेकाले ओपिडी सेवा आजबाट नियमित रुपमा सञ्चालन गर्ने हस्पिटलले जनाएको हो । हस्पिटलका जनसम्पर्क अधिकारी प्रमिस गिरीले एक विज्ञप्ति निकालेर विगतअनुसार नै नियमित रुपमा ओपिडी सेवाअन्तर्गत सम्पूर्ण सेवाहरु सुरु गर्ने जनाएका छन् ।
जिल्लामा कोरोना संक्रमण दरमा कमि आई निको हुनेको संख्या बढेसँगै स्थानीय प्रशासनले निषेधाज्ञामा पनि खुकुलो पार्दै लैजाने रणनीति लिएका कारण पनि हस्पिटलले ओपिडी सेवा सञ्चालन गर्ने निर्णय लिएको उनको भनाइ छ ।
