मेचीनगर, असार १ । न्वारानमा भोज खाएर बिरामी भएपछि अस्पताल भर्ना भएका झापा मागुरमाडीका स्थानीयहरु उपचारपछि घर फर्किएका छन् ।
अस्पतालमा सामान्य उपचार गरेर उनीहरु ३६ घण्टापछि हिजो साँझ घर फर्किएको मेचीनगर–९ का वडाध्यक्ष कञ्चनकुमार तामाङले जानकारी दिए ।
मेचीनगर–९ माथिल्लो मागुरमाडीका गोविन्द श्रेष्ठको नातिको न्वारानमा भोज खान गएका अधिकांश स्थानीयको स्वास्थ्यमा समस्या देखिएपछि अस्पताल भर्ना गरिएको थियो ।
भोज खाएकामध्ये २७ जना बिरामी भएका थिए । उनीहरुको स्थानीय मेची आम्दा अस्पतालमा उपचार भएको थियो । भर्ना भएकामध्ये जंगबहादुर श्रेष्ठ भने ४८ घण्टापछि डिस्चार्ज भएको वडा अध्यक्ष तामाङले बताए ।
भोजमा रहेको परिकारमा अखाद्य पदार्थ मिसावट हुँदा फुड पोइजनका कारण स्थानीयहरु बिरामी भएको अस्पतालले जनाएको छ ।
उनीहरुमा बान्ता हुने, ज्वरो आउने तथा पखाला चल्ने समस्या देखिएपछि अस्पताल भर्ना गरिएको थियो । तामाङका अनुसार २७ जना नै पूर्णरुपमा स्वस्थ भएर घर फर्किएका हुन् ।
बिरामीहरुको उपचारका लागि नगरपालिकाको स्वास्थ्य शाखाले समेत समन्वय गरेर निःशुल्क औषधिको व्यवस्था गरेको थियो ।
