बिर्तामोड, भदौ ४ । स्कुल बसको ठक्करबाट गम्भीर घाइते भएकी बालिकाको उपचारका क्रममा आज अस्पतालमा निधन भएको छ ।
बुद्धशान्ति गाउँपालिकास्थित कर्णाली एजुकेसन फाउन्डेसनको बसले हिजो ठक्कर दिँदा एकै परिवारका तीनजना घाइते भएका थिए । घाइते अन्य दुईजनाको उपचार भइरहेको प्रहरीले जनाएको छ ।
घाइतेमध्ये ८ वर्षीया समिक्षा बस्नेतको उपचारका क्रममा बिएन्डसी हस्पिटलमा निधन भएको प्रहरीले जनाएको छ । उनी स्थानीय ज्योति अङ्ग्रेजी माविमा पढ्थिन् । बुद्धशान्ति ३ प्रणामी मन्दिरनजिकै भएको दुर्घटनामा ८ वर्षीया समीक्षाको अवस्था चिन्ताजनक थियो ।
जिल्ला ट्राफिक प्रहरी कार्यालय झापाका प्रहरी सहायक निरीक्षक यम खड्काका अनुसार दुर्घटनामा समीक्षासँगै आमा रिता बस्नेत र ५ वर्षीय भाइ सन्दीप बस्नेत घाइते भएका थिए ।
जयपुर बुधबारे सडक खण्डमा पश्चिमबाट पूर्वतर्फ जाँदै गरेको मे. १ क ८६० नम्बरको कर्णाली एजुकेसन फाउन्डेसनको स्कुल बसले सोही दिशातर्फै जाँदै गरेको साइकललाई ठक्कर दिँदा दुर्घटना भएको थियो ।
दुर्घटनामा संलग्न बस र सोही ठाउँ निवासी चालक मदन घिमिरेलाई प्रहरी नियन्त्रणमा लिएको जनाएको छ । बस चालकको लापरबाहीका कारण दुर्घटना भएको ट्राफिक प्रहरीले जनाएको छ ।
