बिर्तामोड, कात्तिक १४ । बिर्तामोड उद्योग वाणिज्य संघको निर्वाचन फागुन १४ गते हुने भएको छ । संघको आज बसेको बैठकले चुनावको मिति तय गरेको हो । संघको साधारणसभा भने यही कात्तिक १८ गते हुनेछ ।
संघमा फागुनसम्म छ हजार मतदाता रहने जनाइएको छ । हालको कार्यसमतिको निर्वाचनमा ८४ दशमलव ८ प्रतिशत मतदाताले मतदान गरेका थिए । अर्थात ३ हजार ८४९ मत खसेको थियो । संघमा कुल मतदाता संख्या ४ हजार ५३९ रहेका थिए । १२ मत पूर्वअध्यक्षहरुको रहेको छ ।
अघिल्लो चुनावमा हालका अध्यक्ष प्रकाश शिवाकोटीले २ हजार १३९ मत प्राप्त गरेका थिए भने उनका प्रतिस्पर्धी सुवास भट्टराईले एक हजार ६१५ मत पाएका थिए ।
फागुन १४ मा हुने चुनावमा अध्यक्षका लागि हालका वरिष्ठ उपाध्यक्ष राजु न्यौपाने, महासचिव अर्जुनकुमार मैनाली र सचिव कृष्ण पौडेलको चर्चा रहेको छ ।
