बिर्तामोड, बैशाख ५ । प्रहरीले इलामबाट झापा ल्याइँदै गरेको काठसहित यात्रुबाहक बस नियन्त्रणमा लिएको छ ।
इलामको दानाबारी प्रहरीको टोलीले मंगलबार मे.१ ख ३१६४ नम्बरको बसबाट सखुवा जातको काठ बरामद गरेको हो ।
सब–डिभिजन वन कार्यालय दानाबारीका अनुसार बसबाट १८.३ किबी सखुवाको काठ बरामद भएको छ ।
बसमा अवैध रुपमा काठ चोरी निकासी भइरहेको सूचना पाएपछि प्रहरीले बस जाँच गरेको थियो ।
बरामद काठ र बस अहिले सब–डिभिजन कार्यालय चुलाचुलीमा राखिएको दानाबारी डिभिजनका जमदार गणेश नेपालले जानकारी दिए ।
उनका अनुसार दानाबारीमा राख्ने ठाउँ अभावका कारण चुलाचुली डिभिजनमा काठ र बस पठाइएको हो ।
बरामद काठबारे आवश्यक अनुसन्धान भइरहेको छ । बुधबार सार्वजनिक बिदा भएका कारण बिहीबार आवश्यक कानुनी कारबाही प्रक्रिया अघि बढाइने नेपालले बताए ।
‘हिजो कागज पत्र हेर्दा समय बित्यो, बुधबार बिदा भएकाले कारबाही अघि बढेको छैन, बिहीबार मुद्दा चलाउने तयारी भइरहेको छ,’ नेपालले भने ।
मंगलबार प्रहरीले नियन्त्रणमा लिएको उक्त गाडी माई नगरपालिका–६ का गणेश नेम्वाङको रहेको खुलेको छ ।
-आयोमेलबाट
