बिर्तामोड, जेठ ११ । बिर्तामोड युनाइटेड एफसी धनकुटाको राजरानीमा जारी ११ औँ रारा गोल्ड कप फुटबल प्रतियोगिताको सेमिफाइनलमा प्रवेश गरेको छ ।
आज शुक्रबार भएको दोस्रो क्वार्टर फाइनल खेलमा बिर्तामोडले रियल स्टार क्लब हेटौँडालाई ४–० गोल अन्तरले पराजित गरेको हो ।
जितका लागि आशिष चापागाईंले तेस्रो र १३ औँ मिनेट तथा योगेश गुरुङले ६३ औँ र दोस्रो हाफको अतिरिक्त समयमा दुई–दुई गोल गरे । चापागाईं खेलको प्लेयर अफ दि म्याच बने र नगद ७ हजार प्राप्त गरे ।
जेठ १६ गते फाइनल खेल हुने प्रतियोगिताको विजेताले नगद पाँच लाख, ट्रफी र प्रमाणपत्र पाउनेछ ।
