बिर्तामोड, असार १४ । झापाको अर्जुनधारास्थित शनिश्चरे खुदुनाबारी सडक खण्डमा दुर्घटना हुँदा दुईजना घाइते भएका छन् ।
आज साँझ शनिश्चरे बजार उत्तर नारायण चोकमा भएको सडक दुर्घटनामा अर्जुनधारा-२ का तिलक रम्तेल र मनोज मण्डल घाइते भएको स्थानीयबासीले बताए ।
शनिश्चरेबाट खुदुनाबारीतर्फ जाँदै गरेको मे.३ प ९७८ नम्बरको मोटरसाइकलले साँझ ६ः३० बजे नारायण चोकनजिकै साइकलयात्री अर्जुनधारा-७ का ३५ वर्षीय मण्डललाई ठक्कर दिएको थियो ।
रम्तेलको टाउको र मुखमा र मण्डलको मुखमा चोट लागेको शनिश्चरे प्रहरी चौकीले जनाएको छ । उनीहरुलाई उपचारका लागि बिर्तामोड ल्याइएको छ ।
रम्तेलको टाउकोमा चोट लागेका कारण बिर्ता सिटी हस्पिटल र साइकल यात्री मण्डलको मनमोहन अस्पतालमा उपचार भइरहेको जनाइएको छ ।
