बिर्तामोड, साउन २ । तीन वर्षको तथ्यांक हेर्ने हो भने झापामा सडक दुर्घटनामा क्रमशः कमि आएको देखिएको छ । सडक दुर्घटनाको दर र मानवीय क्षति पनि घटेको छ ।
आर्थिक वर्ष २०७८–०७९मा ६११ वटा, २०७९–८० मा ८०४ वटा र २०८०–०८१ मा ५९३ वटा सडक दुर्घटना भएको जिल्ला ट्राफिक प्रहरी कार्यालय झापाले जनाएको छ ।
दुर्घटनाको संख्यासँगै मानवीय क्षति पनि घटेको छ । २०७८–०७९ मा ९६ पुरुष, १५ महिला र ५ बालबालिका गरी जम्मा ११६ जनाको मृत्यु भएको थियो ।
२०७९–०८० मा ८२ पुरुष, २४ महिला र ८ बालबालिका गरी ११४ जनाले दुर्घटनमा ज्यान गुमाएको कार्यालय प्रमुख नवराज न्यौपानेले बताए ।
तर, आर्थिक वर्ष २०८०–०८१ मा ७१ पुरुष, १० महिला र ६ बालबालिका गरी ८७ जनाको सडक दुर्घटनामा मृत्यु भएको छ ।
त्यस्तै, सख्त घाइते र सामान्य घाइतेको संख्या पनि घटेको छ । २०७८–०७९ मा १८७ पुरुष, ४१ महिला र २६ बालबालिका गरी २५४ जना सख्त घाइते भएका थिए ।
२०७९–०८० मा १३५ पुरुष २६ महिला र १२ बालबालिका गरी सख्त घाइते हुनेहरुको संख्या १७३ रहेको थियो । तर, २०८०–०८१ मा १३१ पुरुष, २४ महिला र ९ बालबालिका गरी १६४ जना सख्त घाइते भएका छन् ।
त्यस्तै २०७८–०७९ मा ४९७ पुरुष, १४० महिला र ६५ बालबालिका गरी ७०२ जना सामान्य घाइते भएका थिए ।
२०७९–०८० मा ७९६ पुरुष, २२१ महिला र ८३ बालबालिका गरी एक हजार १०० जना सामान्य घाइते भएका थिए ।
तर, २०८०–०८१ मा ५६७ पुरुष, १८० महिला र ५६ बालबालिका गरी ८०३ जना सामान्य घाइते भएको न्यौपानेले जानकारी दिए ।
