बिर्तामोड, चैत ११ । झापाको सीमावर्ती काँकरभिट्टा नाका हुँदै भारतबाट सुनजस्तो धातु ल्याउने दुईजनासहित पाँचजनालाई प्रहरीले पक्राउ गरेको छ ।
पक्राउ पर्नेमा ताप्लेजुङ मैवाखोला ६ स्थायी घर भई हाल झापा बुद्धशान्ति २ बस्ने ४० वर्षीय राम लिम्बू र रामेछाप दुरम्बा ७ स्थार्यी घर भई हाल काठमाडौँ बस्ने २६ वर्षीय प्रशान्त मोक्तान रहेका छन् ।
त्यस्तै, अनुसन्धानका क्रममा थप तीनजना पक्राउ परेका हुन् । उनीहरुलाई मेचीनगर नगरपालिका ६ स्थित होटल एभरेस्टबाट पक्राउ गरिएको प्रहरीले जनाएको छ ।
बारा जितपुर १८ स्थायी घर भई काठमाडौँ ५७ वर्षीय राधेश्याम माझी, रुकुम बाफिकोट ७ स्थायी घर भई दाङ तुलसीपुर–१३ बस्ने ४० वर्षीय कमल कुसारीको र भारत पश्चिम बंगाल दार्जिलिङ बस्ने ६३ वर्षीय बलबहादुर क्षेत्री पक्राउ परेका हुन् ।
पाँचै जनालाई पक्राउ गरी आवश्यक कारबाहीको लागि इलाका प्रहरी कार्यालय काँकरभिट्टामा राखिएको जिल्ला प्रहरी कार्यालय झापाले जनाएको छ ।
आज दिउँसो १२ः३० बजे मेचीनगर ६ पुरानो मेची पुलमा पानीट्याङ्कीबाट नेपालतर्फ भाडाको सिटी सफारीमा चढेर आउँदै गर्दा शंका लागेर प्रहरीले लिम्बू र मोक्तानको शरीर तलासी लिएको थियो ।
लिम्बू र मोक्तानको शरीर तलासी लिँदा ४९ थान सुनजस्तो धातु भेटिएको हो । लिम्बूले लगाएको ज्याकेटको गोजीभित्र पत्रिकाले बाइन्डिङ गरेको पोकामा सुनजस्तो देखिने २९ थान र मोक्तानले लगाएको कालो रंगको जिन्स पाइन्टको अगाडि र पछाडिको गोजीमा पत्रिकाले बाइन्डिङ गरेको पोकामा लेखिएको सुनजस्तो देखिने २० थान वस्तु फेला परेको हो ।
