बिर्तामोड, जेठ १० । विपन्नलाई खाद्यान्न सहयोग उपलब्ध गराउँदै आएको एकका लागि एक अभियानले शनिबार बिर्तामोड ६ मा खाद्य सामग्री वितरण गरेको छ ।
स्थानीय जलकन्या देवी मन्दिरमा आयोजित एक कार्यक्रमका बीच अभियानले ३० विपन्न परिवारलाई खाद्य सामग्री प्रदान गरेको सहारा नेपालका सहायक वरिष्ठ प्रबन्धक घनश्याम रायले जानकारी दिए ।
अभियानको साझेदार संस्था रोटरी क्लब अफ बिर्तामोडका अध्यक्ष निर्मल भट्टराईको अध्यक्षतामा भएको कार्यक्रममा दैनिक ज्यालादारी गर्दै आएका परिवारलाई २५ किलो चामल, २ किलो दाल, २ किलो नुन, १ लिटर खाने तेल, साबुनलगायतका आवश्यक सामग्री वितरण गरियो ।
कार्यक्रमका प्रमुख अतिथि वडा अध्यक्ष सूर्य कन्दङ्वाले ६ नम्बर वडाबासीलाई खाद्यान्न उपलब्ध गराइदिएकोमा अभियानप्रति आभार व्यक्त गरे । उनले ३० परिवारको अभिभावक बन्न सफल भएको भन्दै अभियानले गरेको अन्य गतिविधिको पनि प्रशंसा गरे ।
अभियानका सहसंयोजक समाजसेवी विनोद बस्नेतले अभियानको औचित्यमाथि प्रकाश पारेका थिए । उनले अभियानको मुख्य उद्देश्य भनेको हुनेखाने एक परिवारले हुँदा खाने अर्को परिवालाई सहयोग गर्ने रहेको स्पष्ट पारे । लक डाउनको अवधिमा कोही पनि मानिस भोकै बस्नु नपर्ने उनले बताए ।
कार्यक्रममा अभियानका सदस्यहरु केदार गिरी, मदनगोपाल सुब्बा, वडा सदस्यहरु, टोल विकास संस्थाका प्रतिनिधिहरुका उपस्थिति रहेको थियो । अभियानले यसअघि झन्डै २ हजार परिवारलाई खाद्यान्न वितरण गरिसकेको छ ।
