बिर्तामोड, कात्तिक ११ । प्रतिस्पर्धात्मक खेलमा आयोजक न्यु स्टार क्लबलाई हराउँदै बिर्तामोडको रेड स्टार एफसी न्यु स्टार जिल्लास्तरीय फुटबल प्रतियोगिताको फाइनलमा प्रवेश गरेको छ ।
आज भएको पहिलो सेमिफाइनल खेलमा न्यु स्टारमाथि १–० गोल अन्तरको जित निकाल्दै रेड स्टार उपाधिनजिक पुगेको हो ।
रेड स्टारका लागि खेलको ३० औँ मिनेटमा प्रदिप बुढाथोकीले गोल नै निर्णायक बन्यो । खेलको प्लेयर अफ द म्याच रेड स्टारका बुढाथोकी भए । उनले नगद २ हजार पाए ।
उनलाई आजका प्रमुख अतिथि बिर्तामोड ७ का वडा अध्यक्ष अविरल कृष्ण खरेल, क्लबका अध्यक्ष कृष्ण लिम्बू र सौजन्यकर्ता सइन्द्र राईले वितरण गरे ।
बिर्तामोड-७ स्थित स्थानीय सुन्दर निचाझोडा वनको सुन्दर डाँडा खेलमैदानमा जारी खेलमा भोलि दोस्रो सेमिफाइनल खेलमा धाइजन चारआली एफसीले जलथल एफसीको सामना गर्नेछ ।
प्रतियोगिताको विजेताले नगद ५१ हजार र उपविजेताले नगद ३१ हजारसहित आकर्षक ट्रफी पाउनेछ । प्रत्येक खेलको प्लेयर अफ द म्याचले नगद २ हजार पाउने क्लबका अध्यक्ष कृष्ण लिम्बूले बताए ।
विधागततर्फ पाँचवटा विधामा जनही ३३ सय र बेस्ट प्लेयर बन्ने खेलाडीले ट्रफीसहित नगद ५ हजार पाउने आयोजकले जनाएको छ ।
