बिर्तामोड, कात्तिक २७ । झापाको बिर्तामोडमा नेपाल प्रिमियर लिग (एनपिएल) का लागि विराटनगर किंग्सको ट्यालेन्ट हन्ट कार्यक्रम सम्पन्न भएको छ ।
टिमले कोशी प्रदेशका ५ जिल्लामा गर्न लागेको ट्यालेन्ट हन्ट बिर्तामोडको युनाइटेड क्रिकेट एकाडेमीमा सम्पन्न भएको हो । कार्यक्रममा एक सयभन्दा बढी खेलाडी सहभागी थिए ।
झापाका विभिन्न पालिकाबाट आएका युवा क्रिकेटरहरुको सहभागितामा उक्त ट्यालेन्ट हन्ट सम्पन्न भएको हो । ट्यालेन्ट हन्टमा टिमका क्रिकेट कोच लाक्पा लामा र दिपेन्द्र चौधरीले छानेका हुन् ।
झापाबाट उदयीमान पाँचजना खेलाडी छानिएका छन् । छानिएका खेलाडीसहित अन्य ३ जिल्लाका छानिएका खेलाडी विराटनगरमा हुने तयारी क्याम्पमा सामेल गर्ने विराटनगर किंग्सका अपरेसन डाइरेक्टर दिपेन्द्र चौधरीले जानकारी दिए ।
कोशी प्रदेश क्रिकेट संघको सहकार्यमा उक्त ट्यालेन्ट हन्ट भइरहेको आयोजकले जनाएको छ । विराटनगर किंग्सको मार्की खेलाडी सन्दीप लामिछाने रहेका छन् ।
उदयीमान खेलाडीहरुको खोजीमा ट्यालेन्ट हन्ट भएको हो । क्यानको आयोजनामा पहिलोपटक हुन लागेको नेपाल प्रिमियर लिग (एनपिएल) मंसिर १५ गतेदेखि पुस ६ गते (नोभेम्बर ३० देखि डिसेम्बर २१) सम्म प्रतियोगिता हुन लागेको हो ।
