बिर्तामोड, मंसिर १६ । प्रथम बुद्धशान्ति गाउँपालिका वडास्तरीय पुरुष टि १० क्रिकेट प्रतियोगिताको उपाधि वडा नम्बर १ ले जितेको छ ।
उपाधिसँगै वडा नम्बर १ ले नगद २० हजार रुपैयाँ, ट्रफी, मेडल र प्रमाणपत्र र उपविजेता बनेको वडा नम्बर ३ ले नगद १० हजार रुपैयाँ, ट्रफी, मेडल र प्रमाणपत्र प्राप्त गरेको गोकुल पौडेलले जानकारी दिए ।
वडा नम्बर ३ लाई ८ विकेटले पराजित गर्दै वडा नम्बर १ ले उपाधि जितेको हो । टस हारेर पहिले ब्याटिङको निम्तो पाएको वडा नम्बर ३ ले निर्धारित १० ओभरमा ७ विकेट गुमाउँदै ७८ रन बनाएको थियो ।
मध्यम लक्ष्य पाएको वाड नम्बर १ ले ९ ओभरमा २ विकेट गुमाउँदै लक्ष्य प्राप्त गरेको थियो ।
फाइनल खेलको प्लेयर अफ द म्याच र प्रतियोगिताकै उत्कृष्ट ब्याटस्मेन वडा नम्बर १ का पारस निरौला भए । उनले नगद ५ हजार रुपैयाँ पाए ।
त्यस्तै, प्रतियोगिकै उत्कृष्ट खेलाडी बुद्धशान्ति–३ का आदिहाङ फागो भए । उनले नगद ५ हजार ५५५ रुपैयाँ प्राप्त गरे ।
उदीयमान खेलाडी बुद्धशान्ति–३ का दिपाङ्कर चौधरी, क्याच अफ द टुर्नामेन्ट साजन गदाइली, उत्कृष्ट किपर अर्पण कार्की भए । उनीहरुले नगद २ हजार पाए ।
उत्कृष्ट बलर वडा नम्बर १ का नमन राउत भए । उनले नगद ३ हजार पाए । फेयर प्ले अवार्ड बुद्धशान्ति–५ ले प्राप्त ग¥यो ।
खेलाडी उत्पादन, प्रोत्साहन र पालिकास्तरीय खेलाडी छनोटको उद्देश्य राखेर प्रतियोगिता आयोजना गरिएको आयोजक वडा नम्बर ३ खेलकुद विकास समितिका संयोजक विनोद नेङवाङले जनाए ।
प्रतियोगिता बुद्धशान्ति गाउँपालिकाको मुख्य सहयोग तथा गाउँपालिका खेलकुद विकास समितिको समन्वयमा मंससर १३ देखि १५ गतेसम्म सञ्चालन भएको हो ।
