मृतकको संख्या एक लाख ४५ हजार नाघ्यो,
संक्रमितको संख्या २१ लाख ८० हजारभन्दा बढी
-हिमाल खरेल
बिर्तामोड, बैशाख ५ । चीनको वुहान सहरबाट विश्वभरि महामारीको रुप लिएको कोरोना भाइरस (कोभिड १९) को संक्रमणबाट विश्वभर पछिल्लो २४ घण्टामा मात्र १० हजार ८७७ जनाको मृत्यु भएको छ । मृतकको संख्या १ लाख ४५ हजार ४१७ जना पुगेको छ ।
कोभिड १९ बारे अपडेट गर्दै आइरहेको वर्ल्डओमिटर्स डट इन्फोका अनुसार २१ लाख ८० हजार ३ जना कोरोना संक्रमित पुगेका छन् । विश्वका २१० मुलुकमा फैलिएको कोरोना भाइरसको संक्रमण पछिल्लो २४ घण्टामा मात्र ९७ हजार ७०७ जनामा देखिएको छ ।
संक्रमितमध्ये ६ लाख ९२ हजार ४६८ जनाको उपचारको फाइल बन्द गरिएको छ । अर्थात, ५ लाख ४६ हजार ७४३ जना उपचारपछि घर फर्किएका छन् । सफल उपचार र निधन भएकाबाहेक १४ लाख ८७ हजार ८४३ जनामध्ये चार प्रतिशत अर्थात ५६ हजार ५७७ जनाको अवस्था दयनीय छ । बाँकी १४ लाख ३१ हजार २६६ जनाको उपचार र अवस्था स्थीर छ ।
संसारमा सबैभन्दा बढी मृत्यु भएको अमेरिकामा मृतकको संख्या ३४ हजार ५८० जना पुगेको छ । अमेरिकामा पछिल्लो २४ घण्टामा मात्र ६ हजार ५४ जनाको कोरोनाका कारण मृत्यु भएको छ भने ३२ हजार ९९५ जना नयाँ संक्रमित फेला परेका छन् । संसारभर मृत्युको झन्डै एक चौथाइ संक्रमित अमेरिकामा छन् । अमेरिकामा करिब १३ हजार ३६९ जना मानिस अझै गम्भीर अवस्थामा छन् ।
त्यस्तै, अमेरिकापछि धेरैका मृत्यु इटलीमा भएको छ । इटलीमा २२ हजार १७० जनाको मृत्यु भइसकेको छ । त्यस्तै, स्पेनमा १९ हजार ३१५, फ्रान्समा १७ हजार ९२०, बेलायतमा १३ हजार ७२९, इरानमा ४ हजार ८६९, बेल्जियममा ४ हजार ८५७, जर्मनीमा ४ हजार ५२, नेदरल्यान्ड्समा ३ हजार ३१५, ब्राजिलमा १ हजार ९४७, टर्कीमा १ हजार ६४३, स्विडेनमा १ हजार ३३३ र स्विटजरल्यान्डमा १ हजार २८१ जनाको मृत्यु भइसकेको छ ।
चीनमा ३ हजार ३४२ जनाको निधन भएको छ । पछिल्लो दुई दिनयता चीनमा मृत्यु भएको छैन भने नयाँ संक्रमित ४६ जना फेला परेका छन् । तर, दक्षिणी छिमेकी मुलुक भारतमा संक्रमित र ज्यान गुमाउनेहरूको संख्या निरन्तर बढिरहेको छ । अहिलेसम्म त्यहाँ ४४८ जना संक्रमितको मृत्यु भएको छ । १३ हजार ४३० जना संक्रमित पहिचान भएको छ । पछिल्लो २४ घण्टामा भारतमा ४३ जनाको मृत्यु भएको छ भने १ हजार ६० जना नयाँ संक्रमित फेला परेका छन् ।
यसैबीच, संक्रमितको संख्या हेर्ने हो भने सबैभन्दा बढी अमेरिकामा छन् । अमेरिकामा ६ लाख ७७ हजार ५६ जना संक्रमित पुगेका छन् । त्यसपछि स्पेनमा १ लाख ८४ हजार ९४८, इटलीमा १ लाख ६८ हजार ९४१, फ्रान्समा १ लाख ६५ हजार २७, जर्मनीमा १ लाख ३७ हजार ६९८, बेलायतमा १ लाख ३ हजार ९३, चीनमा ८२ हजार ३४१, इरानमा ७७ हजार ९९५ र टर्कीमा ७४ हजार १९३ जना संक्रमित पुगेका छन् । (बिहान ०६:०० बजेसम्मको अपडेट)
