बिर्तामोड, मंसिर ३ । पूर्वको सुविधासम्पन्न बिएन्डसी हस्पिटलले ‘मेरो बिएन्डसी मेरो जीवन साथी, प्रभु इन्स्युुरेन्ससँग’ नामक परिवार स्वास्थ्य बीमा कार्यक्रम आजबाट लागु गरेको छ ।
बिएन्डसीको स्वास्थ्य बीमा योजना सरकारको स्वास्थ्य बीमा कार्यक्रमसँग मिल्दोजुल्दो छ । हस्पिटलका कार्यकारी प्रमुख दुर्गा प्रसाईले आफ्नै स्वास्थ्य बीमा कार्यक्रम लागु गरिएको घोषणा गर्दै चार जनासम्मको परिवारले ६ हजार रुपैयाँ प्रिमियम भुक्तानी गरेपछि ५० हजार रुपैयाँसम्मको स्वास्थ्य उपचार सेवा पाउने व्यवस्था रहेको जानकारी दिए ।
बिएन्डसी हस्पिटल र प्रभु इन्सुरेन्स लिमिटेडको सहकार्यमा यो बीमा लागु गरिएको हो । हस्पिटलका प्रमुख कार्यकारी अधिकृत डा. निराजन प्रसाईं र प्रभु इन्स्युरेन्सका प्रमुख कार्यकारी अधिकृत सञ्चित बज्राचार्यले हस्पिटलको सभाहलमा एक कार्यक्रमबीच उक्त बीमा कार्यक्रम सञ्चालन सम्बन्धी सम्झौतामा हस्ताक्षर गरेका छन् ।
प्रभु इन्स्युरेन्स लिमिटेडका प्रमुख कार्यकारी अधिकृत बज्राचार्यले आर्थिक अभावले कोही पनि उपचारबाट बञ्चित हुन नपरोस् भनेर संयुक्त रुपमा बीमा कार्यक्रम ल्याइएको र यसमा बीमित परिवारका सदस्यले बिनाझञ्झट उपचार सेवा पाउने ग्यारेन्टी गरिएको बताए ।
नेपालभर यो बीमा कार्यक्रम लागु हुने तर उपचारका लागि बिएन्डसीमा नै आउनुपर्ने सम्झौतामा उल्लेख छ । बीमा गरेका परिवारका सदस्यले प्रभु इन्स्युरेन्सको शाखामार्फत देशभर जहाँसुकैबाट बीमा गर्न पाउने र उपचारका लागि नगद बोकेर अस्पताल जानु नपर्ने ‘क्यासलेस सर्भिस’ उपलब्ध गराइएको प्रभु इन्स्युरेन्सका बिर्तामोड शाखा प्रमुख नारायण लुइँटेलले जनाए ।
यो बीमा कार्यक्रममा बीमा गराउने, बीमाको पोलिसी दिने र उपचारको रकम भुक्तानी गर्ने आधिकारिक निकाय प्रभु इन्स्युरेन्स लिमिटेड रहेको र बिएन्डसी हस्पिटलले अभिकर्ताको रुपमा बीमाका सदस्य बनाउने र बिना झञ्झट उपचार सेवा प्रदान गर्ने हस्पिटलका जनसम्पर्क अधिकृत प्रमिश गिरीले बताएका छन् ।
“बीमा गराउने निकाय प्रभु इन्सुरेन्स हुनेछ भने हाम्रो बीएन्डसी उपचार प्रदान गर्ने निकाय हुनेछ,” हस्पिटलका जनसम्पर्क अधिकृत गिरीले बीमा कार्यक्रमका बारेमा जानकारी दिँदै भने, “यो बीमा कार्यक्रममा सहभागी परिवारका सदस्यले बिएन्डसीमा उपचार सेवा लिन कतैबाट सिफारिस लिनुपर्दैन र कुनै लाइनमा बस्नु पनि पर्दैन । सिधै हस्पिटल आएर उपचार सेवा लिन सक्नुहुनेछ ।”
बीमा कार्यक्रमको प्रिमियम बुझाएका सदस्यहरुले तीन महिनापछि उपचार सेवा पाउनेछन् । हरेक वर्ष नवीकरण गर्न सकिने व्यवस्था रहेको बताइएको छ ।
बीमाअन्तर्गत बिएन्डसी हस्पिटलको ओपिडी सेवा, इमर्जेन्सी सेवा, अन्तरंग सेवा, प्याथोलोजी सेवा, रेडियोलोजी सेवा र शल्यक्रिया सेवा पाउने व्यवस्था छ । तर, औषधि भने बीमा कार्यक्रमबाट उपलब्ध नहुने गिरीले बताए ।
झापा, इलाम, पाँचथर, ताप्लेजुङ, मोरङ, सुनसरीसहित देशभरबाट आगामी एक वर्षमा एक लाख परिवारलाई ‘मेरो बिएन्डसी मेरो जीवन साथी, प्रभु इन्स्युरेन्ससँग’ कार्यक्रमको सदस्य बनाउने लक्ष्य राखिएको उनले बताए । पूर्वाञ्चल क्यान्सर अस्पतालको उपचार सेवा भने यो बीमा कार्यक्रममा समेटिएको छैन ।
हाल बिएन्डसी हस्पिटलमा सरकारको स्वास्थ्य बीमा कार्यक्रम लागु छैन । सरकारी स्वास्थ्य बीमाअन्तर्गत उपचारमा खर्च भएको करोडौँ रकमको भुक्तानी दिन स्वास्थ्य बीमा बोर्डले आनाकानी गरेपछि बिएन्डसीले बाध्य भएर सरकारी बीमा कार्यक्रम बन्द गर्नुपरेको हस्पिटलका कार्यकारी प्रमुख दुर्गा प्रसाईं बताउँछन् ।
‘आम नागरिकले सिफारिस, लाइन आदिको झञ्झट बेगर बीमाको उपचार सेवा पाउन् सकुन् भनेर हाम्रै परिकल्पना अनुसार यो नयाँ कम्सेप्टको बीमा कार्यक्रम लागु गरेका छौँ,’ प्रसाईंले भने, ‘आशा छ सबै क्षेत्रबाट सकारात्मक सहयोग र सद्भाव प्राप्त हुनेछ । एक वर्षको अनुभवपछि आगामी दिनमा बीमाअन्तर्गत पाउने उपचार सुविधाको दायरा अझ फराकिलो बनाउन हामी लाग्ने प्रतिबद्धता व्यक्त गर्दछौँ ।’
