बिर्तामोड, बैशाख २८ । धनकुटामा जारी १६ औँ सहिद भीमनारायण गोल्डकप फुटबल प्रतियोगितामा बिर्तामोड युनाइटेड फाइनलमा प्रवेश गरेको छ ।
धनकुटाको तल्लो टुँडीखेलमा शुक्रबार भएको दोस्रो सेमिफाइनल खेलमा आयोजक सहिद भीमनारायण स्मृति प्रतिष्ठानलाई ३–० गोल अन्तरले हराउँदै बिर्तामोड उपाधिनजिक पुगेको हो ।
खेलको ४३ औँ मिनेटमा बिर्तामोडका अनिश लिम्बूले गोल गर्दै टोलीलाई अग्रता दिलाए । त्यसपछि खेलको ४६ औँ मिनेटमा आयोजक टोलीका गोलकिपर प्रदिप भण्डारीले डिबक्सबाहिर बिर्तामोडका खेलाडीलाई लडाएपछि रातो कार्ड पाएर बाहिरिएपछि आयोजक १० खेलाडीमा सीमित भयो ।
खेलको ४७ औँ मिनेटमा अभिषेक गुरुङले गोल गर्दै खेल २–० गोलको स्थितिमा पुर्याए खेलको ६६ औँ मिनेटमा आयोजक टोलीका पदम भट्टराईले आत्मघाती गोल गरेपछि झापाले ३–० को अग्रता बनायो ।
खेलमा झापाका मौसम लिम्बू म्यान अफ द म्याच घोषित हुँदै नगद ५ हजार ५ हात पारे ।
बिर्तामोडले उपाधिका लागि विभागीय टोली सशस्त्र प्रहरीको एपिएफ एफसीसँग शनिबार प्रतिस्पर्धा गर्नेछ ।
प्रतियोगिताको विजेताले नगद ५ लाख र उपविजेताले २ लाख ५० हजार रुपैयाँसहित ट्रफी, मेडल, प्रमाणपत्र हात पार्नेछन् ।
