दमकमा १ लाख ७६ हजारसहित ७ जना जुवाडे पक्राउ

बिर्तामोड, माघ १३ । झापाको दमकमा जुवा खेलिरहेका सातजना जुवाडेलाई प्रहरीले पक्राउ गरेको छ ।

दमक–१० सेतुमारीस्थित खेतमा टिनको छानो भएको वरिपरि घेराबारा नभएको खुला गोठमा जुवा खेलिरहेका अवस्थामा उनीहरु हिजो मध्यरातमा पक्राउ परेका हुन् ।

पक्राउ पर्नेहरुमा उर्लाबारी-९ का चारजना, दमक-१० का दुईजना र काठमाडौँका एकजना रहेका छन् ।

उनीहरुको साथबाट १६ थान कौडा र नगद १ लाख ७६ हजार ४९० रुपैयाँ बरामद भएको छ । उनीहरुलाई नियन्त्रणमा लिई आवश्यक कारबाहको लागि इलाका प्रहरी कार्यालय दमकमा राखिएको जनाइएको छ ।