बिर्तामोड, जेठ १८ । झापाको शिवसताक्षी नगरपालिका–४ बोलोचोकस्थित झापा इनर्जीको प्लान्टमा आज सोमबार दिउँसो आगलागी भएको छ । आगलागीबाट करिब ६ करोड रुपैयाँबराबरको क्षति भएको छ ।
जिल्ला प्रहरी कार्यालय झापाका अनुसार दिउँसो २ः१० बजे प्लान्टमा अचानक आगलागी भएको हो । आगलागी के कारणले भएको भन्ने तत्काल खुल्न नसकेको प्रहरीले जनाएको छ ।
आगलागीबाट प्लान्टभित्र रहेका विभिन्न मेसिन तथा उपकरण जलेर नष्ट भएका छन् । घटनामा मानवीय क्षति भएको छैन । झापा इनर्जीले सोलारबाट विद्युत उत्पादन गर्दै आएको छ ।
शिवसताक्षी नगरपालिका र कमल गाउँपालिकाको दमकल तथा स्थानीयबासीको संयुक्त प्रयासमा आगो दिउँसो २ः५० बजे पूर्ण रूपमा नियन्त्रणमा आएको जनाइएको छ ।
आगो नियन्त्रणका लागि इलाका प्रहरी कार्यालय झिलझिले र इलाका प्रहरी कार्यालय शिवगञ्जबाट प्रहरी परिचालन भएका थिए । प्रहरीले आगलागीको कारण तथा क्षतिको विस्तृत विवरणबारे थप अनुसन्धान भइरहेको जनाएको छ ।
