बिर्तामोड, फागुन १७ । पाँच वर्षपछि हुन लागेको पाँचौँ संस्करणको मेचीनगर गोल्डकप अन्तर्राष्ट्रिय आमन्त्रण नकआउट फुटबल प्रतियोगिताको तयारी अन्तिम चरणमा पुगेको छ ।
कोभिड १९ तथा अन्य प्राविधिक कारणले चौथो संस्करण भएपछि रोकिएको मेचीनगर गोल्डकपको पाँचौँ संस्करणको तयारी तीव्र गतिमा भइरहेको आयोजक काँकरभिट्टा फुटबल ट्रेनिङ सेन्टरका उपाध्यक्ष अशोक राईले बताए ।
काँकरभिट्टा माविको खेलमैदानमा हुने प्रतियोगिताका लागि बाँसको अस्थायी प्यारापिट धमाधम बनाइँदैछ । पाँच हजार दर्शक क्षमताको प्यारापिट बनाइएको सेन्टरका सल्लाहकार तथा गोल्डकप मुल समितिका सदस्य शेरबहादुर बस्नेतले बताए ।
त्यस्तै, खेलमैदानको स्तरोन्नति पनि अन्तिम चरणमा पुगेको छ । रोलर लगाउने, घाँस मिलाउने, मैदान सम्याउने काम दुई दिनभित्र पूरा हुने सेन्टरका अध्यक्ष नवराज ओलीले जानकारी दिए ।
प्रतियोगितालाई स्थानीयसँग प्रत्यक्ष जोड्ने उद्देश्यले सेन्टरले संस्थापक सदस्य बनाउने काम पनि धमाधम गरिरहेको छ । अहिलेसम्म १०० जनाभन्दा बढी सदस्य बनिसकेको बस्नेतले बताए । गोल्डकपको सदस्य बन्न १० हजार रुपैयाँ तोकिएको छ ।
फागुन २४ गतेदेखि हुने प्रतियोगितामा भारतका दुईसहित मोफसलका तीन र ए डिभिजनका तीन क्लबको सहभागिता रहनेछ । पोखरा गोल्डकपको विजेता उज्वेकिस्तानको टोलीलाई सहभागी गराउनेबारे कुरा भइरहेको बस्नेतले जनाए ।
उपाध्यक्ष राईका अनुसार प्रतियोगितामा चर्च ब्वाइज युनाइटेड, मछिन्द्र एफसी, सशस्त्र प्रहरीको एपिएफ एफसी, धरान फुटबल क्लब, एनएसएल टिम झापा एफसी र आयोजक काँकरभिट्टा फुटबल ट्रेनिङ सेन्टर तथा भारतको जर्जियन युनाइटेड दार्जिलिङ र ग्लोबल फुटबल क्लब आसाम सहभागी हुनसक्ने छन् ।
चैत २ गते हुने फाइनल खेलको विजेताले नगद १० लाख, ट्रफी र मेडल पाउनेछ भने उपविजेताले नगद पाँच लाख, ट्रफी र मेडल प्राप्त गर्ने अध्यक्ष ओलीले बताए ।
त्यस्तै, प्रतियोगिताको सर्वोत्कृष्ट खेलाडीले नगद ५१ हजार र ट्रफी पाउँदा उच्च गोलकर्ताले नगद २५ हजार र ट्रफी पाउनेछ ।
उत्कृष्ट प्रशिक्षक र गोलकिपरले नगद २१ हजार र ट्रफी तथा उदीयमान खेलाडीले नगद ११ हजार र ट्रफी पाउनेछ । प्रत्येक दिनको प्लेयर अफ म्याचले नगद ११ हजार र ट्रफी पाउनेछन् ।
मेचीनगर नगरपालिका संरक्षक रहेको प्रतियोगिताको मुख्य प्रायोजक धुलाबारीको होटल मेची क्राउन रहेको छ ।
