बिर्तामोड, चैत २३ । नेपाल प्रगतिशील प्राध्यापक संगठन केन्द्रीय समितिको आसन्न निर्वाचनमा झापा बिर्तामोडका डक्टर सुमन खरेलले महासचिव पदमा उम्मेदवारी घोषणा गरेका छन् ।
हाल संगठनको उपमहासचिव रहेका खरेल त्रिभुवन विश्वविद्यालय केन्द्रीय क्याम्पसमा ग्रामीण विकासका सहप्राध्यापक हुन् ।
२० वर्षदेखि प्राध्यापनमा रहेका खरेलसँग यसअघि संगठनको केन्द्रीय सदस्य र उपमहासचिव भएर काम गरेको सिद्धहस्त अनुभव रहेको छ ।
उनले ग्रामीण विकासअन्तर्गत स्थानीय शासनको सार्वजनिक सेवा प्रवाह विषयमा पिएचडी गरेका छन् ।
सरल, शान्त एवम् बौद्धिक नेताको रुपमा कहलिएका खरेल संगठनको ११ औँ केन्द्रीय अधिवेशनका लागि दह्रो उम्मेदवारको रुपमा खडा भएर प्राध्यापकमाझ चर्चा गरिएको छ ।
प्राज्ञिक हिसाबले नेतृत्व गर्दै पेशागत हकहितका लागि अघि बढ्नुपर्ने बताउने खरेलका ग्रामीण विकास, सुशासन, स्थानीय शासन विषयमा अन्तर्राष्ट्रिय जर्नलहरुमा लेखहरु प्रकाशन हुँदै आएका छन् ।
उनका आधा दर्जन पुस्तकहरु प्रकाशित छन् । संगठनका केन्द्रीय अधिवेशन यही बैशाख ८ र ९ गते काठमाडौँमा हुँदैछ ।
