बिर्तामोड, बैशाख ३ । विराटनगरमा जारी ‘नोबेल विराट गोल्डकप’ को ३८ औँ संस्करणमा पूर्वविजेता झापा ११ फाइनलमा प्रवेश गरेको छ । विराटनगरस्थित सहिद मैदानमा बुधबार राति भएको पहिलो सेमिफाइनल खेलमा विभागीय टोली नेपाल पुलिस क्लबलाई १–० ले स्तब्ध पार्दै झापाले उपाधि भिडन्त पक्का गरेको हो ।
झापाको जितमा फागुराम थारूले गरेको गोल नै निर्णायक बन्यो । उनले खेलको ६७ औँ मिनेटमा सेकेन्ड बार च्यापेर गरेको कडा प्रहारमा गोल भएपछि झापाको जित सुनिश्चित भएको थियो ।
यो जितसँगै झापाले १० वर्षअघिको बदला समेत लिएको छ । २०७२ सालमा भएको विराट गोल्डकपको फाइनलमा झापा र पुलिस नै भिडेका थिए, जहाँ पुलिसले झापालाई १–० ले नै हराउँदै उपाधि जितेको थियो ।
१० वर्षपछि सोही मैदान र सोही स्कोरमा पुलिसलाई पाखा लगाउँदै झापाले फाइनल यात्रा तय गरेको हो । खेलको प्यलेर अफ द म्याद झापा ११ का स्वलोमन किङ घोषित भए । उनले ११ हजार रुपैयाँ पाए ।
खेलको पहिलो हाफ भने गोलरहित बराबरीमा सकियो । सुरुवाती समयमा पुलिसले झापालाई दबाबमा राखे पनि आधा दर्जनभन्दा बढी अवसरलाई सदुपयोग गर्न सकेन ।
१८ औँ मिनेटमा पुलिसका सञ्जीव लामाको प्रहार बाहिरियो भने लगत्तै प्रज्ज्वल चौधरीको प्रहारले पनि दिशा लिन सकेन । २८ औँ मिनेटमा सञ्जीव लामाले डिबक्स भित्रबाट गरेको कडा प्रहार बारमा लागेर फर्कियो । ४० औँ मिनेटमा धीरेन्द्र शाहको प्रहार पनि विफल हुँदा पुलिस अग्रता लिनबाट चुक्यो ।
झापाले अब उपाधिका लागि आज बिहीबार हुने अन्तिम सेमिफाइनलको विजेतासँग प्रतिस्पर्धा गर्नेछ । अन्तिम सेमिफाइनलमा घरेलु टोली सम्राट स्पोटर्स क्लब र चर्च ब्वाइज युनाइटेडबीच प्रतिस्पर्धा हुँदैछ ।
चर्च ब्वाइजले विभागीय टोली एपिएफलाई १–० ले हराउँदै अन्तिम चारमा स्थान बनाएको हो भने सम्राट स्पोटर्सले भारतको बिरसामुण्डा स्पोटर्स एकेडेमीलाई ३–१ ले पराजित गर्दै सेमिफाइनल यात्रा तय गरेको थियो ।
प्रतियोगिताको विजेताले नगद ११ लाख र उपविजेताले नगद ५ लाख रुपैयाँ नगद पुरस्कार प्राप्त गर्नेछ । प्रतियोगिताको फाइनल खेल बैशाख ५ गते हुनेछ ।
