मेचीनगर, साउन २२ । धार्मिक तथा पर्यटन प्रबर्द्धन गर्ने उद्देश्यले झापाको मेचीनगर १ मा मनसा नागदेवी ४९ धारा तथा हिले सिमसार क्षेत्रमा धार्मिक मेलाको आयोजना गरिने भएको छ ।
नाग पञ्चमीको अवसरमा धार्मिक तथा सांस्कृतिक कार्यक्रम आयोजना गरिने आयोजक समितिले सोमबार पत्रकारसँगको कुराकानीमा जानकारी दिएका छन् ।
स्थानीय क्षेत्रमा प्रकट भएको ऐतिहासिक भूमिलाई विकास गर्दैै धार्मिक क्षेत्रको गौरव र गन्तव्यस्थलको रुपमा देशविदेशमा परिचित गराउने उद्देश्य लिएर कार्यक्रमको आयोजना गरिएको अध्यक्ष महेन्द्र मल्लले बताए ।
मनसा नागदेवी ४९ धारा व्यवस्थापन समितिको आयोजनामा भदौ २ गतेदेखि ४ गतेसम्म सांस्कृतिक, धार्मिक तथा पराम्परागत लगायतका विविध कार्यक्रम गरिने अध्यक्ष मल्लको भनाइ छ । कार्यक्रमका लागि विभिन्न उपसमिति बनाएर जिम्मेवारी दिइएको छ ।
कार्यक्रमअन्तर्गत पहिलो दिन विभिन्न विद्यालयका विद्यार्थीबाट सांस्कृतिक कला प्रदर्शनी गर्ने कार्यक्रम तय गरिएको छ भने दोस्रो दिन राष्ट्रियस्तरका ख्यातिप्राप्त कलाकारको प्रस्तुति तथा तेस्रो दिन धार्मिक मेला र भजन कीर्तन प्रतियोगिताको तयारी गरेको छ । युवा पण्डित प्रशान्त न्यौपानेबाट अध्यात्मिक कथा प्रवचन हुनेछ ।
मनसा नागदेवीको मन्दिरसँगै ४९ वटा धारा निर्माण गरिएको छ । धर्मसँगै पर्यटन प्रबर्द्धन गर्ने दीर्घकालीन गौरवको योजना ल्याएको जग्गादाता एवम पूर्वजनप्रतिनिधि डिकेन्द्र थापाले जानकारी दिए ।
नयाँ पुस्तालाई इतिहासबारे जानकारी गराउँदै ‘संरक्षणमा जुट्नुपर्छ’ भन्ने भावनाको विकास गर्न पर्यटकीय स्थललाई मेचीनगरकै उच्च बनाउने मेचीनगर १ का वडा अध्यक्ष रामकुमार राईले बताए । कार्यक्रम सफल बनाउन वडाको तर्फबाट सम्पूर्ण सहयोग गर्नेसमेत उनले प्रतिबद्धता जनाएका छन् ।
