दमक, असोज ८ । माछाको ग्रेभीका लागि निक्कै चर्चित झापा दमकको अम्बिका माछा फ्राइ होटलबाट ठुलो परिमाणको अखाद्य माछा बरामद गरिएको छ ।
दमक नगरपालिकाको बजार अनुगमन टोलीले सोमबार अम्बिका माछा फ्राइबाट करिब ६ क्विन्टल भण्डारण तथा कुहिएका माछाहरू बरामद गरेको हो ।
सो टोलीले माछा फ्राइको अनुगमन गर्दा बिक्रीका लागि ल्याएको माछा भारतबाट आयात गरी राखिएको अवस्थामा फेला पारेको थियो ।
सो माछा अवैध रुपमा भित्र्याएको पाइएपछि अनुगमन टोलीले नगर प्रहरी लगाएर माछा जफत गरेको थियो ।
दमक नगरपालिकाले यसअघि सूचना निकालेर मरेका माछा बिक्रीमा प्रतिबन्ध लगाएको थियो । अम्बिका माछामा सडेको माछा बिक्री गर्ने गुनासो रहँदै आएको थियो ।
दमकपछि अम्बिका माछा फ्राइ भनेर बिर्तामोडमा होटल सुरु गरिएको भए पनि ग्राहकले स्वाद मन नपराएरपछि सुनसान जस्तै हुने गरेको छ ।
