मेचीनगर, पुस १० । मेचीनगर७ मा जारी प्रथम जोरसिमल कप २०८० फुटबल प्रतियोगिताअन्तर्गत ब्रदर्श एफसी र सालबारी एफसी विजयी भएका छन् ।
प्रतियोगिताको आजको पहिलो खेलमा ब्रदर्श एफसीले घोडाजिन एफसीलाई टाइब्रेकरमा ४–१ गोल अन्तरले जित हासिल गरेको हो ।
निर्धारित समयमा दुवै टिमले समान १–१ गोल गरेपछि खेलको नतिजा टाइब्रेकरचर्फ धकेलिएको थियो । जसमा ब्रदर्श विजेता बन्यो ।
खेलमा घोडाजिनको तर्फबाट पुजन मगरले १ गोल र ब्रदर्शको तर्फबाट सन्दिप रसाइलीले १ गोल गरेका थिए ।
खेलको म्यान अफ दि म्याच ब्रदर्श एफसीका गोल किप्पर रोमन क्षेत्री घोषित भए । उनलाई फुटबलप्रेमी दिनेश तिवारीले नगदसहित ट्रफी प्रदान गरे ।
त्यस्तै, आज भएको दोस्रो खेलमा सालबारी एफसी विजयी भएको छ । चारआली एफसीलाई ३–२ गोल अन्तरले हराउँदै सालबारी विजयी भएको हो ।
पहिलो हाफमा २–० ले अग्रता कायम गरेको चारआली दोस्रो हाफमा सम्हालिन नसक्दा ३ गोल खान पुग्यो । चारआलीको तर्फबाट मनकुमार लिम्बूले २ गोल गरेका थिए भने सालबारीको तर्फबाट अर्जुन किस्कूले २ तथा बाबु धिमालले १ गोल गरे ।
खेलको म्यान अफ दि म्याच अर्जुन किस्कू घोषित भए । उनलाई फुटबलप्रेमी दिनेश तिवारीले नगदसहित ट्रफी प्रदान गरे ।
पुस १६ गतेसम्म सञ्चालन हुने प्रतियोगितामा विजेता टिमले नगद ३० हजार र उपविजेता टिमले नगद २० हजारसहित ट्रफी, मेडल र प्रमाणपत्र प्राप्त गर्ने आयोजक समितिका अध्यक्ष सञ्जय मेचेले जानकारी दिए ।
