मेचीनगर, माघ २ । झापाको चारआलीमा रहेको अरिदमन गणले आन्तरिक पर्यटकहरुलाई सर्पदंशसम्बन्धी जानकारी प्रदान गरेको छ ।
मेचीनगरको बाहुनडाँगीमा भएको तरुल उत्सव कार्यक्रममा आउने स्थानीय पर्यटकहरुलाई लक्षित गरी गणले सर्पदंशबारे जानकारीमुलक दुई दिने कक्षासमेत सञ्चालन गरेको थियो ।
गणका सर्पदंशसम्बन्धी विज्ञ सैनिकहरुले महोत्सवका प्रमुख अतिथि कोशी प्रदेशका वन तथा पर्यटनमन्त्री गणेश उप्रेती र प्रतिनिधिसभा सदस्य विश्वप्रकाश शर्मालगायत करिब एक हजारजना आगन्तुकहरुलाई सर्पसम्बन्धी जानकारी गराएका थिए ।
उनीहरुले जिल्लामा पाइने सर्पका किसिमहरु, विषालु सर्प तथा अविषालु सर्पको डसाइ पत्ता लगाउने तरिका, सर्पले डसेपछि गर्नुपर्ने कार्यहरु, सर्पको डसाइबाट बच्ने उपाय र चारआली सर्पदंश उपचार केन्द्रबाट प्रदान गरिने उपचार तथा सेवाका बारेमा जानकारी गराएका थिए ।
गणका सैनिकहरुले जनचेतना फैलाउन सर्पदंशसम्बन्धी पर्चा तथा पम्पेट वितरण समेत गरेका थिए ।
