बिर्तामोड, माघ २। झापाको कनकाई नगरपालिका ३ मा घरको तीन तलामाथिको रेलिङबाट लडेर ४ वर्षीय बालक गम्भीर घाइते भएका छन् ।
आज (मंगलबार) दिउँसो ३ बजेको समयमा आकाश अधिकारीका छोरा सुवास अधिकारी घरको तीन तलामाथिको रेलिङबाट भुइँमा खस्दा गम्भीर घाइते भएको जिल्ला प्रहरी कार्यालय झापाले जनाएको छ ।
मोरङ बुढीगंगा–३ का आकाश र उनका छोरा कनकाई–३ बस्ने आफन्त लक्ष्मी बरालको घरमा पाहुना आएका थिए ।
गम्भीर घाइते भएका बालकको अहिले बिएन्डसी हस्पिटल बिर्तामोडमा उपचार भइरहेको प्रहरीले जनाएको छ ।
इलाका प्रहरी कार्यालय सुरुंगाको टोली घटनास्थल गई घटनाबारे थप अनुसन्धान गरिरहेको बताइएको छ ।
