बिर्तामोड, माघ ४ । झापाको बिर्तामोडमा दस वर्षपछि पहिलोपटक एकजना बालिकामा दादुराको संक्रमण देखापरेको छ ।
बिर्तामोड-३ की ५ वर्षीया बालिकामा दादुरा देखापरेको हो । दुई दिनअघि ती बालिकालाई उपचारका लागि बिर्तामोड नगर अस्पताल ल्याइएको छ ।
दादुराको लक्षण देखिएपछि उनको रगत परीक्षण गर्दा पुष्टि भएको नगर अस्पतालका निरीक्षक गणेश रिजालले बताए । उनले ती बालिकालाई औषधि दिएर आइसोलेसनमा राखिएको जानकारी दिए ।
रिजालका अनुसार ती बालिकालाई दादुराको दुईवटै खोप लगाइएको थियो । बिर्तामोडमा एक दशकयता दादुराको संक्रमण देखिएको थिएन ।
यसैबीच, झापा गाउँपालिकाको एउटै गाउँका छजनालाई दादुराको संक्रमण देखिएपछि घरधुरी सर्वेक्षणदेखि सरोकारवालाहरुलाई अभिमुखीकरण गर्न थालिएको छ ।
झापा गाउँपालिकाको वडा नम्बर ७ को सन्थाल बस्तीका छजनालाई दादुरा संक्रमण देखिएको हो । ७ वर्षदेखि ३७ वर्षसम्मका उमेर समूहका संक्रमितहरु चारजना महिला र दुईजना पुरुष रहेका छन् ।
सन् २०२३ मा झापामा छजनालाई दादुरा देखिएको थियो । तर, सन् २०२४ को दुई साताकै अवधिमा सातजनालाई संक्रमण देखिसकेको स्वास्थ्य कार्यालय झापाका प्रमुख रमेश बाराकोटीले बताए ।
उनले केही महिनापछि झापा जिल्लामा दादुरा खोपको अभियान सञ्चालन गर्न लागेको जानकारी दिए ।
