बिर्तामोड, चैत १ । जीवनमा सबैभन्दा महत्वपूर्ण कुरा नै स्वास्थ्य हो । तर, यही विषय हामीले अपनाउने जीवनशैलीले निर्धारण गर्छ । खासगरी ३० वर्षको उमेरपछि शारीरिक र मानसिक रूपमा स्वस्थ्य रहनका लागि केही आनीबानीहरू सुधार्न जरुरी हुन्छ ।
यो उमेरपछि मानिसमा कयौँ प्रकारका मानसिक र शारीरिक बदलाव देख्न सकिन्छ । फलतः आफ्नो व्यक्तित्वमा बदलावदेखि खानपानमा पनि ध्यान दिन जरुरी हुन्छ ।
यो उमेरले बताउँछ कि तपाईंको जीवन अब अझ जिम्मेवारी र परिपक्वतातर्फ उन्मुख छ । किशोरावस्थाको केटाकेटीपन सक्किसकेको छ भने समाज र परिवारमा एक योग्य नागरिकका रूपमा आफैँलाई स्थापित गराउने समय आएको छ ।
यस सन्दर्भमा आज हामी ३० देखि ३५ को उमेरमा देखिने मानसिक र शारीरिक परिवर्तन र त्यससँग जुध्न जीवनशैलीमा गर्नुपर्ने परिवर्तन बारे जानकारी गराउँदै छौँ ।
३० वर्षपछि मेटाबोलिज्म कम हुन थाल्छ
सर्वप्रथम स्वास्थ्यको कुरा गर्ने हो भने यो उमेरपछि महिला पुरुष दुवैको शरीरमा मेटाबोलिज्म कम सुस्त हुन थाल्छ । यदि यसलाई ध्यानमा राख्दै खानपानमा परिवर्तन गरिएन, २०–२५ को उमेरमा जस्तो जे पनि जस्तो पनि खान थालियो भने यसले तपाईंको स्वास्थ्यमा ठुलो हानि गर्नसक्छ । मेटाबोलिज्म सुस्त हुन सुरु हुने भएकोले यो उमेरपछि क्यालोरी खपत कम भइरहेको हुन्छ भने मोटोपन बढ्छ । यही कारण किशोरावस्थामा जुन खानपानले मासिन फिट रहन्छ त्यही खानपानको शैलीले ३० पछि काम गर्दैन । यही कारण यो उमेरपछि जीवनशैली बदल्न जरुरी छ ।
जीवनशैली र डाइटमा परिवर्तन
यो उमेरपछि डाइट प्याटर्न परिवर्तन जरुरी छ । फलतः फास्ट फुडको साटो स्वस्थकर खानाको मात्रा बढाउनुपर्छ । आफ्नो डाइटमा हरियो तरकारी, फलफूलको मात्रा बढाउनुपर्छ भने धेरै पानी पिउनुपर्छ । धेरै सक्रिय उमेरमध्ये एक भएका कारण तीनपटक पेट भरी खान जरुरी छ भने प्रोटिन, भिटामिन र खनिजयुक्त खाद्यवस्तुलाई डाइटमा समेट्नुपर्छ ।
३० वर्ष पारि, सम्बन्धमा इमानदारी
कयौँ अनुसन्धानबाट के देखिएको छ भने ‘ट्वान्टिज’ को भन्दा ३० वर्षको आसपास बनेका सम्बन्धहरू मजबुत हुन्छन् । वास्तवमा यो उमेरमा मानिसहरू आफैँलाई चिन्न सक्छन् भने जोडीको पनि कुरा बुझ्ने भइसकेका हुन्छन् । आफूलाई स्वीकार गर्ने र अरूलाई पनि स्वीकार्ने बानी विकास भइसकेको हुन्छ ।
अर्थात अरूको आनीबानी आफूले चाहेजस्तै नहुँदा यो मानिस खराब हो भन्ने गलत सोचाइबाट यो उमेरका व्यक्तिहरुले पार पाइसकेका हुन्छन् । आफैमा भरोसा गर्ने उमेर भएका कारण दोस्रो व्यक्तिमा भरोसा गर्ने क्षमता पनि बढेको हुन्छ । जसले जोडीलाई ज्यादा माया र इज्जत दिने बानी विकास हुँदा सम्बन्ध मजबुत बन्छ ।
बचतमा ध्यान दिन जरुरी
यो उमेरबाट तपाईंले कमाई मात्र हैन बचतमा पनि ध्यान दिन जरुरी हुन्छ । बिस्तारै बढ्दो जिम्मेवारीले तपाईंको खर्च बढ्दा बुढेसकालमा खाली हात हुनुपर्ने हुन सक्छ । परिवारका सदस्यहरू बिरामी हुने क्रम बढ्छ भने आफैँ पनि शारीरिक रूपमा कमजोर हुने दिन नजिकिन्छ । जसले ठुलो रकम एकैचोटि आवश्यक पर्न सक्ने सम्भावनाहरू बढ्छन । तपाईं व्यवसाय गर्नुहुन्छ या नोकरी आफ्नो कमाइको २५ प्रतिशत बचत गर्नु सुरु गर्नुहोस् ।
हड्डी कमजोर हुन थाल्छ
हुनत अस्वस्थकर जीवनशैलीकै कारण अहिले २५ बाटै हड्डीसँग सम्बन्धित रोगहरू आम युवाको रोग बनेको छ । तर, ३० वर्षपछि भने प्राकृतिक रूपमै हड्डी कमजोर बन्न थाल्छन् । हड्डीमा रहने मिनरल्समा आउने कमिले यो समस्या देखिने हुँदा क्याल्सियम र भिटामिन डि पाइने खानेकुरा डाइटमा सामेल गर्न जरुरी छ । यसको साथै, दैनिक व्यायाम गर्नुपर्छ भने धूमपान र मद्यपान छोड्न आवश्यक छ ।
अनि बिहे र जोडी खोज्ने कुरा नि ?
हो यो पनि ३० वर्षपछि ध्यान दिनुपर्ने विषय हो । नेपालीमा समाजमा त त्योभन्दा अघि नै घरपरिवार, आफन्त र साथीसंगीले बिहे गर्न दबाब दिन थालिसकेका हुन्छन् । तर, बिहे बच्चाको खेल त हैन । जीवनभरको सम्झौता हो । त्यसैले, कसैले भनेर वा दबाबमा परेर हैन आफैँले मनबाटै चाहेको जोडी रोज्नुहोस् । कस्तो मान्छे चाहिन्छ जीवनमा आफैँले छान्नुहोस् । बिहेका लागि मानसिक रूपमा तयार हुनुहुन्छ भने मात्रै निर्णय गर्नुहोस् । नत्र हतारमा निर्णय गरेर फुर्सदमा पछुताउन पर्ला है !
-जोयनेपालबाट
