बिर्तामोड, बैशाख १६ । सरकारले आजदेखि झापासहित सात जिल्लामा हात्तीपाइलेविरुद्धको औषधि खुवाउँदै छ ।
हात्तीपाइले रोगको जोखिम रहेका झापा, धनुषा, सर्लाही, रौतहट, रसुवा, कपिलवस्तु र महोत्तरीका जिल्लामा हात्तीपाइलेविरुद्धको औषधि खुवाउन लागिएको हो ।
हात्तीपाइलेविरुद्धको औषधि सबैलाई खुवाउँदै आम औषधि सेवन अभियान सञ्चालन गर्न लागिएको स्वास्थ्य सेवा विभाग इपिडिमियोलोजी तथा रोग नियन्त्रण महाशाखाका निर्देशक डक्टर रुद्र मरासिनीले जानकारी दिए ।
यसअघि ती सात जिल्लामा आम औषधि सेवन अभियान सञ्चालन गरिए पनि सफल नभएपछि पुनः अभियान सञ्चालन गर्न थालेको हो । अभियान दुई हप्तासम्म सञ्चालन हुनेछ ।
निर्देशक डक्टर मरासिनीका अनुसार सात जिल्लाका १०१ स्थानीय तहका ५० लाख ७८ हजारजनालाई हात्तीपाइले रोगविरुद्धको औषधि खुवाउन थालिएको हो ।
दुई वर्षभन्दा बढी उमेरका सबैलाई औषधि खुवाइने उनको भनाइ छ । अभियानमा यसपटक करिब ६ हजार स्वास्थ्यकर्मी र पाँच हजार ८०० महिला स्वास्थ्य स्वयमसेविका परिचालन गरिने छन् ।
