भद्रपुर, कात्तिक २२ । झापामा छठ पूजालाई लक्षित गरेर एक हजार ५०० जना सुरक्षाकर्मी खटाइएको जिल्ला प्रशासन कार्यालय झापाले जनाएको छ ।
छठ पूजाको अवसरमा लाग्ने मेला र रमिता हेर्न आउनेको भीडभाडमा अप्रिय घटना हुन नदिन एक हजार १०० जना नेपाल प्रहरी र ४०० जना सशस्त्र प्रहरी खटाइएको हो ।
झापाका ५६ स्थानका नदीकिनार तथा तलाउहरुमा आज साँझ मेला लाग्नेछ । मेला हेर्न आउने र व्रतालुहरुको सुरक्षाका लागि प्रहरी खटाइएको हो ।
त्यस्तै, सवारी साधनको चाप नियन्त्रण गर्दै सडक सञ्चालन सहज बनाउन ५६ जना ट्राफिक प्रहरी खटाइएको प्रशासन कार्यालय झापाका एकजना अधिकारीले जानकारी दिए ।
गत वर्ष झापामा ५१० जना सशस्त्र प्रहरी, ३७१ जना नेपाल प्रहरी र ५५ जना ट्राफिक प्रहरी गरी ९३६ जना सुरक्षाकर्मी परिचालन गरिएको थियो ।
मेची, निन्दा, बिरिङ र रतुवा नदीको किनारमा भक्तजनहरुको बढी भीडभाड हुने भएकोले त्यहाँ ठुलो संख्यामा प्रहरी परिचालन गरिएको छ ।
छठ पूजामा हुन सक्ने सम्भावित आपराधिक तथा उच्छृखंल गतिविधि रोक्न विभिन्न स्थानमा प्रहरी बिट, पैदल गस्ती, मोबाइल गस्ती परिचालन गरिएको छ ।
