बिर्तामोड, बैशाख १८ । अहिले झापासहित देशभरिको मौसममा बदली भई सातै प्रदेशका विभिन्न जिल्लामा हल्का वर्षा भइरहेको छ । झापाका अधिकांश भूभागमा साँझ ५ बजेदेखि भएको वर्षा अहिले पनि जारी छ ।
पश्चिमी र स्थानीय वायुका साथै पूर्वी नेपाल नजिकैको तल्लो वायुमण्डलमा विकसित भएको न्यून चापीय क्षेत्रको प्रभावले गर्दा देशका विभिन्न भागमा हावाहुरी, असिना र चट्याङसहित मध्यम वर्षाको भएको हो ।
मौसममा आएको यो फेरबदलका कारण सर्वसाधारणलाई आवश्यक सतर्कता अपनाउन मौसम पूर्वानुमान महाशाखाले आग्रह गरेको छ । यो प्रक्रिया आज रातिसम्म कायम रहने अनुमान गरिएको छ ।
विशेषगरी कोशी प्रदेशका तराई क्षेत्र, मधेस प्रदेशका पर्सा, बारा, रौतहट र सर्लाही नजिकैको भारतीय क्षेत्रमा मेघगर्जन, चट्याङ र हावाहुरीसहित वर्षा गराउने शक्तिशाली प्रणाली विकसित भइरहेको छ ।
उक्त प्रणाली उत्तर–पूर्वतर्फ सरिरहेकाले ती जिल्ला र आसपासका क्षेत्रमा उच्च सावधानी अपनाउनु पर्ने देखिएको छ ।
हाल लुम्बिनी प्रदेशमा पूर्णतया बदली रहेको छ भने गण्डकी, कर्णाली, सुदूरपश्चिम, कोशी र बागमती प्रदेशका पहाडी तथा हिमाली भू–भागमा साधारणतया बदलीको अवस्था छ ।
अहिले लुम्बिनी प्रदेशका केही स्थान र गण्डकी तथा कर्णाली प्रदेशका थोरै ठाउँमा मेघगर्जन र चट्याङसहित हल्का वर्षा भइरहेको छ ।
देशका बाँकी भू–भागमा पनि आंशिक बदली रहेको छ । वर्षासँगै आउन सक्ने हावाहुरी र चट्याङले जनजीवनमा असर पार्न सक्ने भएकाले सतर्क रहन सूचना जारी गरिएको छ ।
