बिर्तामोड । कोरोना भाइरस (कोभिड–१९) को प्रकोप नियन्त्रण गर्न जिल्ला प्रशासन कार्यालय झापाले होली पर्वप्रति नागरिकलाई सजग गराएको छ ।
जरुरी सूचना निकालर कार्यालयले आउँदो होली पर्वलाई लक्षित गरी पानीमा नभिज्न, अबिर र लोला हान्ने कार्य नगर्न र एकै ठाउँ भीड नगर्न सुझाव दिएको छ । त्यस्तै, जिल्लामा धेरै मानिस जम्मा हुने सभा, समारोह, मेला, गोष्ठी, महोत्सवजस्ता कार्यक्रम नगर्न, शैक्षिक संस्थाहरुलाई धेरै मानिस भेला भएर गरिने वार्षिकोत्सवलगायतका कार्यक्रम नगर्न अनुरोध गरेको छ ।
यसअघि स्वास्थ्य तथा जनसंख्या मन्त्रालयले सभा, मेला महात्सव तथा अत्यधिक मानिस भेला हुने कार्यक्रम आयोजना नगर्न सूचना जारी गरिसकेको छ । विश्व स्वास्थ्य संगठनको प्रतिवेदनमा समेत नेपाल कोरोना भाइरसको उच्च जोखिममा रहेको छ । प्रशासनले कोरोना भाइरसको जोखिमबाट जोगिन नियमित रुपमा साबुन पानीले हात धुन, अनावश्यक भीडमा नजान र खोक्दा, हाछ्यँु गर्दा मुख छोप्न अनुरोध गरेको छ ।
