बिर्तामोड, भदौ २७ । रोटरी क्लब अफ बिर्तामोडले बिर्तामोेड ३ मा रहेको भरत विश्रान्ति आश्रम परिसरमा फलफूल तथा अन्य जातका बिरुवा रोपेको छ ।
आज एक औपचारिक कार्यक्रमको आयोजना गरेर क्लबले र रोट्याट्रक क्लब बिर्तामोडको सहयोगमा बृक्षारोपण गरेको हो ।
विराटपोखरस्थित भरत विश्रान्ति आश्रम परिसरमा रहेको दुई बिघा क्षेत्रफलमा पहिले रोपिएका बिरुवाको गोडमेल र थप नयाँ बिरुवाहरू रोपिएको क्लबका अध्यक्ष ओमकृष्ण बिमलीले जानकारी दिए ।
सो स्थानमा विगतका वर्षमा रोटरीले नै बिरुवा रोपेको थियो । अध्यक्ष बिमलीका अनुसार आज आँप, लिच्ची, जामुन, कटहर, रक्तचन्दन, सफेदा, अमला लगायतका बिरुवा रोपिएको छ ।
यस वर्ष सहायक डिजी राधिका गुरुङले केही बिरुवा उपलब्ध गराएकी हुन् । बिरुवा गोडमेल, रोपण कार्यक्रममा रोटरी डाइरेक्टरहरु मीनप्रकाश मैनाली, निर्मल भट्टराई, डा. सन्ध्या राठी र भावी अध्यक्ष प्रकाश शिवाकोटी, रोटरियन, रोट्यक्ट्रर र सामाजिक अगुवा हर्कलाल गिरी, जीवनकुमार खड्कालगायतको सहभागिता रहेको थियो ।
