बिर्तामोड, माघ ३ । थाइल्यान्डमा जारी एएसबिसी यु–२२ पुरुष तथा महिला बक्सिङ च्याम्पियनसिपमा झापा भद्रपुरकी त्रिसा जवेगूले पदक पक्का गरेकी छन् ।
जवेगूले मिडल वैट ७५ किलो तौल समूहमा बाई पाएर कास्य पदक पक्का गरेकी हुन् । जवेगूले हालै गण्डकी प्रदेशमा सम्पन्न नवौँ राष्ट्रिय खेलकुदमा ७५ केजी तौल समूहमा स्वर्ण पदक जितेकी थिइन् ।
त्यस्तै, पुरुष खेलाडी विजय बाटाले पनि क्रुजर वैट ८६ किलो तौल समूहमा बाई पाएर कास्य पदक पक्का गरेका छन् ।
विजयले सेमिफाइनलमा भारतीय खेलाडी मुस्किता माईखेलसँग प्रतिष्पर्धा गर्ने छन् भने त्रिसाले काजकिस्तानका येरजहान गुलसायासँग खेल्ने छन् ।
त्यसैगरी अर्का खेलाडी हेमा राईले महिला ५७ किलो तौल समूहमा क्वाटरफाइनलमा सिंगापुरका खेलाडी चाव जी मिन बेरनिससँग प्रतिस्पर्धा गर्ने छन् ।
महिला ४८ किलो तौल समूहमा सुस्मा तामाङले भियतनामी खेलाडी फाम थि किनहानसँग क्वाटरफाइनलमा खेल्ने छन् ।
पुरुष ४८ किलो तौल समूहमा नेपालका लालप्रसाद उप्रेतीले फिलिपिन्सका दुरेन मार्क लेफचरसँग, फेदर वैट पुरुष ५७ किलो तौल समूहमा नेपाली खेलाडी इन्द्रबहादुर सुनारले लाओसका खेलाडी सोक्साखोनसँग क्वाटरफाइनलमा प्रतिस्पर्धा गर्ने छन् ।
च्याम्पियनसिप २०२३ को जनवरी १६ देखि २७ तारिखसम्म बैंककमा हुने नेपाल बक्सिङ संघले जनाएको छ ।
